کراچی: سندھ حکومت کے مشیر مرتضیٰ وہاب کا کہنا ہے کہ سندھ کو اس کے حصے کی گیس ملنا اس کا آئینی حق ہے، صوبے کو صرف 800 سے 900 ایم ایم سی ڈی ایف گیس مل رہی ہے جبکہ ضرورت 1500 ایم ایم سی ڈی ایف گیس کی ہے۔
تفصیلات کے مطابق مشیر سندھ حکومت مرتضیٰ وہاب کا کہنا ہے کہ سندھ ملک کی 68 فیصد گیس پیدا کرتا ہے، افسوس کی بات ہے صنعتی ہوں یا گھریلو تمام صارفین کو گیس کی کمی کا سامنا ہے۔
مشیر سندھ حکومت کا کہنا تھا کہ 2400 سے 2500 ایم ایم سی ایف ڈی گیس سندھ پیدا کرتا ہے، سندھ کو 800 سے 900 ایم ایم سی ڈی ایف گیس مل رہی ہے جبکہ صوبے کو 1500 ایم ایم سی ڈی ایف گیس کی ضرورت ہے۔
انہوں نے کہا کہ سندھ کو اس کے حصے کی گیس ملنا اس کا آئینی حق ہے، وفاقی حکومت کے وعدوں کے باوجود پاکستان اسٹیل کے ساڑھے 4 ہزار ملازمین کو بے روزگار کر دیا گیا، اب ریلوے کے نئے وزیر نے کہا ہم ادارہ نہیں چلا سکتے اس کی نجکاری کرنی پڑے گی۔
مرتضیٰ وہاب کا کہنا تھا کہ لیبر ایک ایسا شعبہ ہے جو صوبوں کو دیا گیا ہے، لیبر پر اب وفاقی حکومت کا کوئی حق نہیں ہے۔
انہوں نے مزید کہا کہ 2 سال سے وفاق کے تحت چلنے والا ایف بی آر اداروں کو خطوط لکھ رہا ہے، خطوط لکھے گئے کہ یہ پیسے آپ صوبے کو نہیں وفاقی حکومت کو دیں گے۔ پنجاب حکومت بھی کہہ رہی ہے یہ معاملہ صوبائی حکومت کا ہے، صوبائی حقوق کو پامال کرنے کی کوشش کی گئی ہے۔
