عوام نے گھروں سے نہ نکل کر ایم کیو ایم کے خلاف فیصلہ دے دیا، مصطفیٰ کمال -
The news is by your side.

Advertisement

عوام نے گھروں سے نہ نکل کر ایم کیو ایم کے خلاف فیصلہ دے دیا، مصطفیٰ کمال

کراچی: پاک سرزمین پارٹی کے چیئرمین مصطفیٰ کمال نے پریس کانفرنس سے خطاب کرتے ہوئے کہا کہ پہلی بار کراچی والوں نے خاموشی سے 30 سال سے جاری زیادتیوں کا جواب دے دیا۔

تفصیلات کے مطابق کراچی میں پاک سرزمین پارٹی کے چیئرمین مصطفیٰ کمال نے پریس کانفرنس کرتے ہوئے کہا کہ میں کراچی کی عوام کو خراج تحسین پیش کرتا ہوں جنہوں نے 30 سال سے ہونے والے ظلم اور زیادتیوں کا خاموشی سے جواب دے دیا۔

ان کا کہنا تھا کہ کراچی کی عوام نے ایم کیو ایم کو ووٹ دینے کے لیے گھروں سے نہ نکل کر قاتلوں کے خلاف فیصلہ سنا دیا کہ بس اب بہت ہوگیا۔

مصطفیٰ کمال کا کہنا تھا کہ اس الیکشن کے لیے ایم کیو ایم کے جن کارکنان نے محنت کی اور کام کیا ہم انہیں اپناتے ہیں اور ہمیں ان سے ہمدردی ہے۔ ان ایم کیو ایم کارکنان اور ان افراد کے لیے جنہوں نے ایم کیو ایم کو 15 ہزار ووٹ ڈالے، ہم دعا کرتے ہیں کہ جلد سے جلد وہ بھی سچائی کو قبول کرلیں۔

اس کے بعد مصطفیٰ کمال نے فاروق ستار کو آڑے ہاتھوں لیتے ہوئے کہا کہ فاروق ستار نے جھوٹ بول کر لوگوں کی آنکھوں میں دھول جھونکنے کی کوشش کی، انہیں بدگمان کیا لیکن کل کا رزلٹ یہ بتاتا ہے کہ عوام نے قائد ایم کیو ایم کے ساتھ فاروق ستار اور کمپنی کو بھی مسترد کردیا ہے۔

انہوں نے کہا کہ عوام نے فاروق ستار کا بھی مینڈیٹ مسترد کردیا ہے۔ انہوں نے آئین تبدیل کر کے اور الطاف حسین سے لاتعلقی کا اظہار کرکے لوگوں کو بیوقوف بنانے کی کوشش کی لیکن عوام نے انہیں بھی مسترد کردیا۔ وہ انتظار کر رہے ہیں کہ قائد ایم کیو ایم اللہ کو یا اسکاٹ لینڈ یارڈ کو پیارے ہوں تو قیادت ان کی جھولی میں گرے۔

واضح رہے کہ کل ہونے والے پی ایس 127 کے ضمنی انتخابات میں پیپلز پارٹی کے امیدوار 21 ہزار سے زائد ووٹ لے کر کامیاب ہوگئے۔ ایم کیو ایم کے امیدوار 15 ہزار ووٹ لے کر دوسرے نمبر پر رہے۔

دوسری جانب ایم کیو ایم نے ضمنی انتخاب کے نتائج کو مسترد کرتے ہوئے انہیں چیلنج کرنے کا فیصلہ کیا ہے۔ ایم کیو ایم کل الیکشن ٹریبونل میں اپنی درخواست جمع کروائے گی۔

Comments

comments

یہ بھی پڑھیں