امریکا کے ایک صحرا میں پراسرار دھاتی ستون کے اچانک نمودار ہو کر غائب ہوجانے کا معمہ ابھی حل ہونے بھی نہ پایا تھا کہ ایسا ہی ستون رومانیہ میں بھی دکھائی دے گیا۔
بین الاقوامی میڈیا کے مطابق امریکی ریاست یوٹاہ کے صحرا میں اچانک ایک آہنی ستون نمودار ہونے کے بعد غائب ہوگیا اور اب ایسا ہی ستون رومانیہ میں بھی دکھائی دیا ہے۔
یوٹاہ کے صحرا میں یہ دھاتی ٹکڑا چند روز قبل دکھائی دیا تھا جس نے دنیا بھر میں لوگوں کو حیران اور کسی حد تک خوفزدہ کردیا تھا، یہ چمکدار آہنی ستون جس طرح نمودار ہوا، اسی طرح غائب بھی ہوگیا تھا۔
اب رومانیہ میں بھی ویسا ہی ستون نظر آیا اور پھر اچانک غائب بھی ہوگیا۔ اکثر افراد یہ کہتے دکھائی دے رہے ہیں کہ یہ خلائی مخلوق یہاں نصب کر گئی ہے اور اب ان کی موجودگی کا خیال انہیں خوفزدہ کیے ہوئے ہے۔
شمالی رومانیہ کے قصبے پیاترا نیامٹ کے میئر اینڈرے کارابیل نے میڈیا کو بتایا کہ اتوار کی سہ پہر وہ ستون وہاں تھا اور اب غائب ہوچکا ہے۔
امریکا اور رومانیہ میں نظر آنے والی یہ انوکھی چیز 1968 کی مشہور سائنس فکشن فلم 2001 اے اسپیس اوڈیسے کی یاد دلاتی ہے۔ اس فلم میں بھی اسی طرح کا خلائی ستون دکھایا گیا تھا۔
رومانیہ کے میئر کا کہنا ہے کہ مجھے یہ خیال پسند آیا کہ کچھ خلائی نوجوان ان مونولیتھس کو دنیا بھر میں لگارہے ہیں۔
اس سے قبل فیس بک پر بات کرتے ہوئے ان کا کہنا تھا کہ وہ اس بات پر اعزاز محسوس کرتے ہیں کہ خلائی مخلوق نے ہمارے شہر کا انتخاب کیا، مگر یہ بہتر ہوتا ہے کہ وہ مقامی پرمٹ کو پہلے حاصل کرلیتے۔
ادھر امریکا میں اس ستون کے غائب ہونے سے متعلق ایک فوٹوگرافر نے ایک تصویر جاری کی ہے، تصویر میں 2 افراد اس ستون کو نکال کر اپنے ساتھ لے جاتے دکھائی دے رہے ہیں۔
