The news is by your side.

Advertisement

این اے 75 ڈسکہ: پی ٹی آئی رہنماؤں نے بڑا دعویٰ کردیا

سیالکوٹ: الیکشن کمیشن نے این اے 75 کے ضمنی الیکشن کا نتیجہ روکنے کا حکم دے دیا ہے مگر پی ٹی آئی رہنماؤں نے بڑا دعویٰ کردیا ہے۔

تفصیلات کے مطابق معاون خصوصی وزیراعلیٰ پنجاب فردوس عاشق اعوان نے دعویٰ کیا ہے کہ ڈسکہ میں پی ٹی آئی امیدوار کامیاب ہوچکا ہے، حلقے کے تمام نتائج آر اوز کو موصول ہوچکے ہیں، فوری طور پر نتائج کا اعلان کیا جائے۔

فردوس عاشق نے نون لیگ پر ڈسکہ کے نتائج پر اثر انداز ہونے کا بھی الزام عائد کرتے ہوئے کہا کہ آراو کا تعلق ناروال سے ہے، احسن اقبال نے رات بھر ریٹرننگ افسر کو یرغمال بنائے رکھا اور نتائج جاری نہ کرنے کا کہا۔

اس سے قبل معاون خصوصی وزیراعلیٰ پنجاب نے ٹوئٹر پر جاری پیغام میں کہا تھا کہ ڈسکہ کے ضمنی الیکشن کے تمام پولنگ اسٹیشنز کے نتائج کے مطابق پاکستان تحریک انصاف 7,827 ووٹوں کی برتری حاصل کرکے میدان مار چکی ہے، ن لیگ کے احسن اقبال، جاوید لطیف، کنیز جونیئر اور عطا تارڑ نے ریٹرننگ افسر کو یرغمال بنارکھا ہے اور انہیں الیکشن نتائج کا اعلان کرنے سے روکا جا رہا ہے۔

وزیراعظم کے معاون خصوصی برائے سیاسی ابلاغ شہباز گل نے بھی ٹوئٹر پر نون لیگ پر نتائج روکنے کا الزام عائد کرتے ہوئے کہا کہ این اے75 کا نتیجہ صبح5بج کر40منٹ پر آچکا،لیکن آر او نارووال کا رہنےوالا ہے، احسن اقبال کے دباؤ کی وجہ سے نتیجہ روک کر بیٹھے ہیں، جیت جائیں تو نواز کے بیانیے کی جیت، ہار جائیں تو نہتی لڑکی۔

شہباز گل نے بھی ٹوئٹ میں دعویٰ کیا تھا کہ پی ٹی آئی NA 75 کا الیکشن 7827 ووٹوں سے جیت چکی، اللہ کا شکر۔ مریم اور ان کے پاپا کے بیانیے کو شکست ہوئی۔ جب آپ ریاست مخالف بیانیہ دیں گے کرپشن کریں گے، تو ہار آپکا مقدر ہوگی۔

دوسری جانب وفاقی وزیر تعلیم شفقت محمود نے بھی سماجی رابطے کی ویب سائٹ پر نون لیگ کو کڑی تنقید کا نشانہ بناتے ہوئے کہا کہ جب ن لیگ جیتے تو سب ٹھیک ہے لیکن جب ہارے تو دھاندلی ہے، پی ٹی آئی حکومت میں نوشہرہ اور وزیر آباد میں میں ن لیگ جیتی، دونوں جگہ پر ن لیگ نےدھاندلی کی کوئی بات نہیں کی، ڈسکہ میں مقابلہ سخت تھا تو ہر طرف دھاندلی کا شور ہے، جو دھوکہ دہی کرتے ہیں وہ شکست تسلیم نہیں کرتے۔

Comments

یہ بھی پڑھیں