اسلام آباد: قومی اسمبلی کا اجلاس فروری کے آخری ہفتے میں منعقد کیا جائے گا جبکہ نو منتخب ارکان کے نوٹیفیکیشنز کا اجرا 20 فروری تک مکمل ہوگا۔
نوٹیفکیشن کے اجرا کے بعد 3 دن کے اندر مخصوص نشستوں کے تعین کا فیصلہ ہوگا۔ قومی اسمبلی اجلاس انتخابات کے انعقاد کے بعد 21 دن کے اندر طلب ہوگا۔ اجلاس طلبی کی سمری وزارت پارلیمانی امور ارسال کرے گی۔
ذرائع نے اے آر وائی نیوز کو بتایا کہ وزیر اعظم کی ایڈ وائس پر صدر مملکت قومی اسمبلی اجلاس طلب کریں گے جبکہ اجلاس کی صدارت اسپیکر راجہ پرویز اشرف کریں گے۔
متعلقہ: نومنتخب اراکین قومی اسمبلی کی حلف برداری کیلیے تیاریاں شروع
افتتاحی اجلاس میں نو منتخب ارکان حلف اٹھائیں گے اور اس کے بعد نئے اسپیکر و ڈپٹی اسپیکر کے انتخاب کا شیڈول جاری ہوگا۔ اس انتخاب کے بعد قائد ایوان کے انتخاب کا شیڈول جاری ہوگا۔
اسپیکر و ڈپٹی اسپیکر کا انتخاب خفیہ رائے شماری سے ہوگا جبکہ نئے قائد ایوان کا انتخاب ڈویژن کے ذریعے ہوگا۔
