The news is by your side.

Advertisement

عرفان صدیقی کو ہتھکڑی لگانے پر اسپیکر قومی اسمبلی کا نوٹس، آئی جی اسلام آباد طلب

اسلام آباد: عرفان صدیقی کو ہتھکڑی لگانے پر اسپیکر قومی اسمبلی نے نوٹس لے لیا، اسپیکر اسد قیصر نے واقعے کی رپورٹ طلب کر لی۔

تفصیلات کے مطابق اسپیکر قومی اسمبلی اسد قیصر نے عرفان صدیقی کو ہتھکڑی لگانے پر آئی جی اسلام آباد کو کل رپورٹ سمیت پارلیمنٹ طلب کر لیا۔

دریں اثنا، اسپیکر قومی اسمبلی نے وزیر داخلہ اعجاز شاہ کو فون کر کے عرفان صدیقی کی گرفتاری اور ہتھکڑیاں لگانے پر تشویش کا اظہار کیا۔

اسپیکر اسد قیصر کا کہنا تھا کہ عرفان صدیقی بزرگ استاد اور سینئر صحافی ہیں، ہمیں قلم کے تقدس کا اور آزادیٔ اظہار رائے کا احترام کرنا ہوگا، قانون کرایہ داری کی خلاف ورزی پر گرفتار کر کے ہتھکڑی لگانا قابل مذمت ہے۔

یہ بھی پڑھیں:  سابق وزیراعظم کے معاون خصوصی عرفان صدیقی ضمانت پر رہا

اسپیکر نے کہا کہ کسی بھی سطح پر کسی سے نا انصافی برداشت نہیں کر سکتا، مہذب معاشروں میں استاد کا احترام لازم ہوتا ہے، معاملے کی مکمل تحقیقات ہونی چاہیے۔

واضح رہے کہ آج کرایہ داری ایکٹ کی خلاف ورزی پر گرفتار ہونے والے سابق وزیر اعظم نواز شریف کے مشیر عرفان صدیقی کو ضمانت پر اڈیالہ جیل سے رہا کر دیا گیا ہے۔

عدالت نے عرفان صدیقی کو گزشتہ روز 14 روزہ جوڈیشل ریمانڈ پر جیل بھیجا تھا، اسسٹنٹ کمشنر مہرین بلوچ نے ان کی ضمانت لی جس کے بعد اسپیشل مجسٹریٹ نے تیس ہزار روپے کے مچلکوں کے عوض نواز شریف کے سابق معاون خصوصی کی ضمانت منظور کرلی۔

Comments

یہ بھی پڑھیں