راولپنڈی: قومی احتساب بیورو (نیب) نے سابق وزیر اعظم نواز شریف کے داماد کیپٹن (ر) صفدر کو مسلم لیگ (ن) کی ریلی سے گرفتار کرلیا ہے۔
تفصیلات کے مطابق کیپٹن (ر) صفدر کی گرفتاری کے لیے ایبٹ آباد میں ان کے گھر پر چھاپہ مارا گیا تاہم وہ نیب کی ٹیم کو چکمہ دے کر راولپنڈی پہنچے اور ن لیگ کی ریلی کی قیادت کرنے لگے جہاں سے نیب نے انہیں گرفتار کرلیا ہے۔
کیپٹن (ر) صفدر تین گھنٹے تک راولپنڈی کی سڑٖکوں پر جلوس نکالتے رہے اور تقاریر کرتے رہے، اس دوران پولیس نے انہیں گرفتار کرنے کی کوشش کی لیکن ن لیگ کے کارکنوں نے مزاحمت کرکے پولیس کو گرفتار کرنے سے روک دیا شام پانچ بجے نیب کی ٹیم نے حتمی کارروائی کرتے ہوئے انہیں گرفتار کرلیا۔
واضح رہے کہ کیپٹن (ر) صفدر کو جمعہ کے روز احتساب عدالت کی جانب سے ایون فیلڈ ریفرنس میں ایک سال قید کی سزا سنائی تھی جس کے بعد سے وہ روپوش ہوگئے تھے۔
کیپٹن صفدر pic.twitter.com/ABeDj6zC6N
— Omar Bin Asif na62 (@omarbinasif) July 8, 2018
دوسری جانب نیب ٹیم سے مزاحمت پر مقدمہ درج کیا جائے گا، نیب ذرائع کے مطابق ن لیگ رہنماؤں سمیت 100 افراد کے خلاف مقدمہ درج ہوگا، پولیس کی مزاحمت کرنے والے افراد سے متعلق تفتیش شروع کردی گئی ہے۔
کیپٹن (ر) صفدر نے آج صبح آڈیو بیان جاری کرتے ہوئے باضابطہ کرنے دینے کا اعلان کرتے ہوئے کہا تھا کہ مانسہرہ شہر سے گرفتاری دینے کا سوچا تھا لیکن پارٹی فیصلے کے نتیجے میں کسی اور شہر سے گرفتاری دے دوں گا، گرفتاری دینا غیرت کا تقاضا ہے اور اس حوالے سے پارٹی فیصلے کا احترام کروں گا۔
خیال رہے کہ کیپٹن (ر) صفدر کو اس سے پہلے 9 اکتوبر 2017 کو بھی نیب مقدمے میں احتساب عدالت میں پیش نہ ہونے پر گرفتار کیا جاچکا ہے۔
