اسلام آباد: جعلی اکاؤنٹس کیس میں کراچی سے مزید 2 افراد کو گرفتار کرلیا گیا ، دونوں ملزمان پر اراضی غیرقانونی طریقے سے الاٹ کرنے کا الزام ہے، ملزمان کو آج رات اسلام آباد منتقل کیا جائے گا۔
تفصیلات کے مطابق جعلی اکاؤنٹس کیس میں اہم پیشرفت سامنے آئی، نیب نے کراچی سے مزید 2 افراد کو گرفتار کرلیا ہے، رات گئے جبار میمن اور شبیر بمباٹ کوگرفتار کیا گیا۔
دونوں ملزمان پراراضی غیرقانونی طریقےسےالاٹ کرنے اور قومی خزانے کو 8ارب روپے کا نقصان پہنچانے کا الزام ہے، ملزمان کو آج رات اسلام آباد منتقل کیا جائےگا۔
یاد رہے 8 مارچ کو جعلی اکاؤنٹس کیس نیب نے سیکریٹری کے ڈی اے آفتاب میمن کو اسلام آباد سے گرفتار کرلیاگیا، آفتاب میمن آصف زرداری کے قریبی ساتھی سمجھے جاتے ہیں۔
مزید پڑھیں :جعلی اکاؤنٹس کیس ، نیب نے آصف زرداری کے قریبی ساتھی کو گرفتار کرلیا
آفتاب میمن پر سات ایکڑ سرکاری زمین ایک شخص کے نام الاٹ کرنے کا الزام ہے، اراضی الاٹ کرنے سے قومی خزانے کو 80 کروڑ روپے کا نقصان پہنچایا تھا۔
نیب اعلامیہ میں کہا گیا آفتاب میمن پر اختیارات کے ناجائز استعمال اور سیکشن نائن اے فائیو کے تحت کرپشن کا الزام بھی ہے جبکہ غیر قانونی الاٹمنٹ کےالزام کی بھی تفتیش جاری ہے۔
گذشتہ ماہ فروری میں منی لانڈرنگ کیس میں اومنی گروپ کے چیف فنانشل افسر اسلم مسعود کو سعودی عرب سے ڈی پورٹ کیا گیا تھا ، جس کے بعد ایف آئی اے ٹیم نے ایئرپورٹ سے حراست میں لے لیا، ذرائع کا کہنا تھا کہ اسلم مسعود منی لانڈرنگ کیس کے حوالے سے اہم معلومات رکھتے ہیں۔
واضح رہے 7 جنوری کو جعلی بینک اکاؤنٹس کیس میں چیف جسٹس نے جعلی بینک اکاؤنٹس کیس کامعاملہ نیب کو بھجوایا تھا، فیصلے میں کہا گیاتھا کہ نیب رپورٹ کا جائزہ سپریم کورٹ کا عمل درآمد بینچ لے گا، نئےچیف جسٹس نیب رپورٹ کا جائزہ لینے کیلئے عمل درآمد بینچ تشکیل دیں۔
فیصلے کے مطابق اگر تحقیقات میں جرم بنتا ہو تو احتساب عدالت میں ریفرنس فائل کئے جائیں، نیب ریفرنس اسلام آباد نیب عدالت میں فائل کئے جائیں، چیئرمین نیب مستند ڈی جی کو ریفرنس کی تیاری اور دائر کرنے کی ذمہ داری دیں۔
خیال رہے جعلی بینک اکاؤنٹ کیس میں جے آئی ٹی رپورٹ میں بلاول ہاؤس اور زرداری خاندان کے دیگر اخراجات سے متعلق انتہائی اہم اور ہوشربا انکشافات سامنے آئے تھے کہ زرداری خاندان اخراجات کے لیے جعلی اکاؤنٹس سے رقم حاصل کرتا رہا۔
