The news is by your side.

Advertisement

نیب کی آصف زرداری کو کل تک نیویارک اپارٹمنٹ سے متعلق ریکارڈ جمع کرانے کی ہدایت

اسلام آباد : قومی احتساب بیورو ( نیب ) نے سابق صدرآصف زرداری کو کل تک نیویارک اپارٹمنٹ سے متعلق ریکارڈ جمع کرانے کی ہدایت کردی۔

تفصیلات کے مطابق آصف زرداری کے نیویارک اپارٹمنٹ سے متعلق نیب تحقیقات جاری ہے، اس حوالے سے نیب راولپنڈی نے سابق صدر آصف زرداری کو خط لکھا۔

خط بلاول ہاؤس اسلام آباد اور بلاول ہاؤس کراچی بھجوائے گئے ہیں ، خط میں آصف زرداری کو سوالنامے کا تحریری جواب دینے اور نیویارک اپارٹمنٹ سے متعلق ریکارڈ جمع کرانے کی ہدایت کردی ہے۔

نیب کی جانب سے کہا گیا ہے کہ آصف زرداری 16جولائی تک ریکارڈنیب راولپنڈی کی ٹیم کوجمع کرائیں۔

یاد رہے نیب نیویارک اپارٹمنٹ سے متعلق کیس میں الیکشن کمیشن سے تمام ریکارڈ موصول ہوگیا تھا ، جس کے بعد تفتیشی ٹیم نے امریکا سے مزید معلومات لینے کا فیصلہ کیا ہے۔

نیب ذرائع کا کہنا تھا کہ نیویارک فلیٹ کسی اور کو منتقل کرنے پر ایم ایل اے لکھا جائے گا ، الیکشن کمیشن میں آصف زرداری نے نیویارک پراپرٹی ظاہرنہیں کی جبکہ نیویارک پراپرٹی رجسٹرار کی پرانی دستاویزات نیب کے پاس موجود ہے ، جس کے مطابق نیویارک میں جائیداد ملکیت آصف زرداری کی ہی تھی۔

نیب دستاویز میں کہا گیا تھا کہ 20جون2007 کو5لاکھ 30ہزار ڈالرمیں اپارٹمنٹ خریدا گیا اور 7جون 2007کوآصف زرداری نےمیری این نامی خاتون کو پاورآف اٹارنی دیا۔

خیال رہے آصف زرداری نےکیس میں 28جولائی تک عبوری ضمانت لے رکھی ہے جبکہ آصف زرداری نے نیب سوالنامے کاجواب اور متعلقہ ریکارڈ جمع کرانے کیلئے ایک ماہ کی مہلت طلب کی تھی۔

Comments

یہ بھی پڑھیں