اسلام آباد : قومی احتساب بیورو (نیب) نے سابق وزیراعظم نوازشریف کا پاسپورٹ اور شناختی کارڈ منسوخ کرنے کی سفارش کردی اور کہا نواز شریف کووطن واپسی کیلئے وزارت داخلہ انٹرپول سے بھی رابطہ کرے۔
تفصیلات کے مطابق قومی احتساب بیورو (نیب) نے سابق وزیراعظم نوازشریف کا پاسپورٹ اور شناختی کارڈ منسوخ کرنے کی سفارش کردی ، ذرائع وزارت داخلہ کا کہنا ہے کہ نیب راولپنڈی کی جانب سےوزارت داخلہ کو خط موصول ہوگیا ہے۔
خط میں کہا گیا ہے کہ نواز شریف کے وارنٹ گرفتاری عدالت سے جاری ہو چکے ہیں، ان کو توشہ خانہ ریفرنس میں اشتہاری قراردینےکاعمل بھی شروع کردیاگیا ہے۔
نیب نے خط میں سفارش کی کہ نواز شریف کے سفری دستاویزات کو منسوخ کیا جائے اور ان کے پاسپورٹ اور شناختی کارڈ کو بلیک لسٹ میں شامل کیا جائے اور نواز شریف کووطن واپسی کیلئے وزارت داخلہ انٹرپول سے بھی رابطہ کرے۔
گذشتہ روز قومی احتساب بیورو نیب راولپنڈی نے سابق وزیراعظم نواز شریف کا نام اسٹاپ لسٹ میں شامل کرنے کیلئے خط لکھا تھا ، خط میں کہا گیا تھا کہ نواز شریف کےاشتہاری ہونےکاریکارڈامیگریشن سسٹم میں شامل کیاجائے۔
ذرائع ایف آئی اے کا کہنا تھا کہ نیب راولپنڈی کا خط ڈی جی ایف آئی اے کو موصول ہوگیا ہے، خط پر مکمل عملدرآمد کرایا جائے گا۔
یاد رہے اسلام آبادہائی کورٹ نے نواز شریف کے اشتہارجاری کرنے کا حکم دیتے ہوئے کہا تھا کہ 30 دن کے اندر اگر ملزم پیش نہیں ہوتے تو اشتہاری قرار دیا جائے۔
