اسلام آباد : سپریم کورٹ نے نیب کی کارکردگی جانچنے کے لئے لوکل کمیشن کے قیام کا تحریری حکم جاری کر دیا ہے۔ چیف جسٹس جواد ایس خواجہ کی سربراہی میں تین رکنی بینچ نے اپنے تحریری حکم میں کہا ہے کہ کمیشن کی سربراہی ایڈیشنل اٹارنی جنرل خواجہ محمدحسین کریں گے۔
کمیشن تحقیقات کرے گا کہ کیا نیب ایف آئی اے اور پولیس نے توقیر صادق کے فرار میں مدد فراہم کی؟ اور توقیر صادق کو پاکستان لانے کے لئے وصول کی گئی رقم معقول تھی یا اس میں غبن کیا گیا؟
کمیشن اس بات کابھی تعین کرے گا کہ نیب نے بڑی مالی بد عنوانی کے مقدمات کی تحقیقات اپنے منطقی انجام تک کیوں نہیں پہنچائیں۔
کمیشن تحقیات میں غفلت برتنے والے افراد یا افسران کا تعین بھی کرے گا اور ان کے خلاف ممکنہ قانونی کارروائی کی سفارش بھی کرے گا۔
عدالت نے اپنے فیصلے میں نیب آرڈیننس کا بھی حوالہ دیاہے جس کے مطابق نیب کے قیام کا مقصد کرپشن کا خاتمہ تھا، عدالت نے قرار دیا کہ نیب اپنے اس مقصد میں مکمل طور پر ناکام د کھائی دیتی ہے۔
یہ ہی وجہ ہے کہ اربوں کی کرپشن کے بڑے اسکینڈل تا حال حل طلب ہیں اور ان کی تحقیقات مکمل نہ ہونے کی کوئی معقول وجہ بیان کرنے سے بھی قاصر ہے۔
