The news is by your side.

Advertisement

نیب کا چھاپہ : محکمہ بلدیات کے دوملازمین گرفتار، کروڑوں کی رقم، دستاویز برآمد

کراچی : قومی احتساب بیورو (نیب) نے محکمہ بلدیات کے پرسنل سیکریٹری اور سابق ایڈمنسٹریٹر کے فرنٹ مین کو کرپشن کے الزام میں گرفتار کرلیا، ملزمان کے قبضے سے کروڑوں کی رقم، سونا اور اہم دستاویزات برآمد کی گئی ہیں۔

تفصیلات کے مطابق کراچی میں نیب نے غیر قانونی بھرتیوں اور میگا پراجیکٹس میں کرپشن کی شکایات پر محکمہ بلدیات کے سیکریٹری اور ڈی ایم سی ویسٹ کے دفاتر پر چھاپے مارے۔

چھاپوں کے دوران نیب ٹیم نے سابق ایڈمنسٹریٹر قمرالدین شیخ کے فرنٹ مین جاوید قمر اور پرسنل سیکریٹری محکمہ بلدیات رمضان سولنگی کو حراست میں لے کر فائلیں تحویل میں لے لیں۔

ترجمان نیب کے مطابق سابق ایڈمنسٹریٹر قمرالدین شیخ کے فرنٹ مین جاوید قمر کو کرپشن کے الزام میں حراست میں لیا گیا ہے، جاوید قمر ڈائریکٹراسٹیبلشمنٹ ڈی ایم سی ویسٹ کے عہدے پر تعینات تھا۔

 نیب حکام کا کہنا ہے کہ جاوید قمر کے گھر پر چھاپے میں دو کروڑ روپے اور اہم دستاویزات بھی برآمد ہوئی ہیں، ملزم کے قبضے سے جعلی فرمز کے نام پر بنائے گئے کاغذات بھی تحویل میں لے لئے گئے ہیں۔

اس کے علاوہ  پرسنل سیکریٹری محکمہ بلدیات رمضان سولنگی کو اس کے دفتر سے گرفتار کیا گیا، ملزم رمضان سولنگی کے دفتر سے اس کا موبائل فون، بھاری رقم اور سونا برآمد کیا گیا ہے۔

ذرائع کے مطابق نیب ٹیم چھاپہ مارنے جب سیکریٹری بلدیات کے دفتر پہنچی تو وہاں موجود عملے سے تلخ کلامی بھی ہوئی، نیب ٹیم مختلف تعمیراتی منصوبوں سے متعلق فائلیں بھی ہمراہ لے گئی، نیب نے سندھ بلڈنگ کنٹرول اتھارٹی کے افسران کو بھی طلب کر لیا ہے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔  

Comments

comments

یہ بھی پڑھیں