اسلام آباد: نیشنل کاؤنٹر ٹیرارزم اتھارٹی (نیکٹا) نے خبردار کیا ہے کہ 13 دسمبر کو کالعدم ٹی ٹی پی دہشت گرد پاکستان میں کارروائی کر سکتے ہیں۔
اے آر وائی نیوز کے مطابق نیکٹا نے تھریٹ الرٹ جاری کیا ہے کہ 13 دسمبر کو کالعدم تحریک طالبان پاکستان کے دہشت گرد کارروائی کر سکتے ہیں تاہم دہشت گردی کہاں ہو سکتی ہے اس کی تفصیلات معلوم نہیں ہو سکی ہیں۔
نیکٹا نے خبردار کیا ہے کہ 13 دسمبر کو پی ڈی ایم کا مینار پاکستان پر جلسہ بھی ہو رہا ہے، پشاور میں ناکامی کے بعد دہشت گردوں نے اپنے منصوبے میں رد و بدل کیا، دہشت گردوں کا ممکنہ حملہ لاہور میں بھی ہو سکتا ہے۔
نیکٹا نے ہدایت کی ہے کہ سیکورٹی کے سخت انتظامات اور مشکوک عناصر پر نظر رکھی جائے۔
پی ڈی ایم جلسہ تھریٹ الرٹ، مریم نواز سمیت دیگر قیادت کو نشانہ بنایا جا سکتا ہے
یاد رہے کہ گزشتہ روزلاہور پولیس نے تھریٹ الرٹ جاری کرتے ہوئے خبردار کیا تھا کہ پاکستان ڈیموکریٹ موومنٹ کے لاہور جلسے میں دہشت گردی ہو سکتی ہے، الرٹ میں کہا گیا تھا کہ مریم نواز سمیت دیگر قیادت کو نشانہ بنایا جا سکتا ہے۔
پولیس سیاسی لیڈر شپ کو بھی ممکنہ حملے کے خطرے سے آگاہ کر چکی ہے، تھریٹ الرٹ میں کہا گیا تھا کہ دوران سفر سیاسی قیادت بلٹ پروف گاڑی کا استعمال کریں، گاڑی کے سن روف سے ہرگز باہر نہ نکلیں، دوران جلسہ لاؤڈ اسپیکر کے استعمال سےگریز کیا جائے۔
