کراچی: نادرا مرکز میں ایک خاتون کے ساتھ ناروا سلوک پر نادرا افسر کے خلاف کارروائی عمل میں لاتے ہوئے انھیں معطل کر دیا گیا۔
تفصیلات کے مطابق اے آر وائی نیوز کی خبر پر چیئرمین نادرا طارق ملک نے سخت نوٹس لیتے ہوئے کورنگی نادرا دفتر میں خاتون شہری کے ساتھ بدتمیزی سے پیش آنے پر اسسٹنٹ ڈائریکٹر عامر سراج کو معطل کر دیا۔
چیئرمین نادرا نے ڈی جی کراچی کو ہدایت کی کہ واقعے کی انکوائری کر کے جلد از جلد قواعد و ضوابط کے مطابق ملوث ملازم کے خلاف ایکشن لیا جائے۔
چیئرمین طارق ملک نے کہا کہ قومی ادارے میں ناقص کارکردگی اور شہریوں کے ساتھ اخلاق سے پیش نہ آنے والے ملازمین کی کوئی جگہ نہیں ہے۔
واضح رہے کہ آج کورنگی میں واقع نادرا مرکز کی ایک ویڈیو سامنے آئی ہے، جسے اے آر وائی نیوز نے نشر کیا، ویڈیو میں اسسٹنٹ ڈائریکٹر عامر سراج شہریوں کے ساتھ ہتک آمیز سلوک کرتے اور دھمکی دیتے نظر آتے ہیں۔
نادرا افسر نے ایک خاتون کو دھمکی دیتے ہوئے کہا ’میرا نام عامر ہے جس کو شکایت لگانی ہے لگا دو‘۔ خاتون نے اپنے کاغذات واپس مانگے تو اسسٹنٹ ڈائریکٹر نے کہا واپس نہیں کروں گا، میری مرضی، میرا نام عامر ہے جس کو شکایت لگانی ہے لگا دو، بے شک میری شکایت پورٹل پر ڈال دو۔
واضح رہے کہ اسسٹنٹ ڈائریکٹر عامر سراج پہلے بھی مِس کنڈکٹ پر نوکری سے فارغ ہو چکے تھے، لیکن افسران کی سرپرستی کی وجہ سے نوکری پر بحالی کے بعد پھر عوام کی عزت نفس کو مجروح کرنے میں مصروف ہیں۔ ذرائع کا کہنا ہے کہ اسسٹنٹ ڈائریکٹر عامر نے بیش تر افراد کے کاغذات شناختی پراسس کے لیے اپنے پاس ناجائز طور پر رکھے ہوئے ہیں۔
