اسلام آباد: سائفر کیس کے سلسلے میں ہونے والی سماعت کے دوران خصوصی عدالت کے جج ابوالحسنات اور پی ٹی آئی وکیل نعیم پنجوتھہ کے درمیان شادی کے بعد کی مجبوریوں پر دل چسپ مکالمہ ہوا۔
تفصیلات کے مطابق آفیشل سیکرٹ ایکٹ کے تحت قائم خصوصی عدالت میں سائفر کیس میں چیئرمین پی ٹی آئی اور شاہ محمود کی ضمانت کی درخواست پر ان کیمرہ سماعت ہوئی، دوران سماعت جج ابوالحسنات ذوالقرنین کی رخصت پر جج اور نعیم پنجوتھہ کے درمیان مکالمہ ہوا۔
ذرائع کا کہنا ہے کہ جج ابوالحسنات نے وکیل سے کہا ’نعیم پنجوتھہ صاحب! ہاتھ ہولا رکھیں!‘
نعیم پنجوتھہ نے جج سے کہا آپ گزشتہ ہفتے چھٹی پر تھے، آپ کی رخصت پر ڈیوٹی جج بھی موجود نہیں تھے، ڈیڑھ ہفتے سے ضمانت پر دلائل نہیں ہوئے، آج بھی پراسیکیوٹر وقت پر نہیں آئے۔
ذرائع کے مطابق جج ابوالحسنات نے وکیل سے کہا نعیم پنجوتھہ صاحب! ہاتھ ہولا رکھیں، کیا آپ کی اہلیہ نہیں ہیں؟ وکیل نے جواب دیا ’’میری ابھی شادی نہیں ہوئی۔‘‘
جج نے کہا ’’جب ہوگی تو میں آپ کی شادی پر ضرور آؤں گا، آپ کو شادی کے بعد اہلیہ کی ذمہ داری کا احساس ہوگا، شادی کے بعد کی مجبوریوں کا احساس آپ کو بعد میں ہوگا۔‘‘
