باکو : نوگورنوکاراخ تنازعے میں شکست خوردہ آرمینیا نے آذربائیجان کی شہری آبادی کو نشانہ بنانا شروع کردیا، آرمینیائی فوج کے میزائل حملے میں 21 افراد ہلاک جبکہ درجنوں زخمی ہوگئے۔
غیر ملکی خبر رساں ادارے کے مطابق وسطی ایشیائی ممالک آذربائیجان اور آرمینیا کے درمیان گزشتہ ایک ماہ سے خونی جھڑپیں جاری ہیں جس میں آرمینیا کی فوج پسپائی کو ہر محاذ کر شکست کا منہ دیکھنا پڑرہا ہے، جس کے باعث اس نے ہواس باختہ ہوکر آذربائیجان کی شہری آبادی پر میزائل داغنے شروع کردئیے۔
آذربائیجان نے الزام عائد کیا ہے کہ آرمینیا کی فوج نے آذری ٹاون بردا پر میزائل حملہ کیا ہے جس کے نتیجے میں 21 شہری جاں بحق جبکہ درجنوں زخمی ہوئے ہیں جبکہ شہری املاک کو بھی شدید نقصان پہنچا ہے۔
دوسری جانب آذربائیجان وزارت دفاع کی طرف سے جاری بیان میں کہا گیا ہے کہ ہوجہ وند، فضولی اور غوبادلی کے محاذوں پر جھڑپیں زیادہ شدت سے جاری ہیں جبکہ محاذ آذربائیجانی فوج کے کنٹرول میں ہے۔
فرنٹ کے مختلف حصوں میں آرمینی فوج کے 2 عدد ٹی۔72 ٹینک، 2 گیراڈ میزائل سسٹم، 14 مختلف توپوں، چند فوجی چوکیوں اور 6 گاڑیوں کو تباہ اور کثیر تعداد میں فوجیوں کو ناکارہ کردیا۔
