قومی بولر نسیم شاہ نے نیوزی لینڈ کے خلاف کراچی میں کھیلے جانے والے پہلے ون ڈے میچ میں وکٹیں لے کر اپنی پرفارمنس کے ذریعے اپنی مرحوم والدہ سے کیا وعدہ بھی پورا کردیا۔
پاکستان کرکٹ بورڈ (پی سی بی) کے ٹوئٹر اکاؤنٹ پر نسیم شاہ کی ایک ویڈیو شیئر کی گئی ہے جس میں انہوں نے کہا کہ جب میں نے انٹرنیشنل کرکٹ کھیلنی شروع کی تھی تب اس سے پہلے میری والدہ کو کرکٹ کا بلکل بھی پتا نہیں تھا لیکن میں نے ان سے وعدہ کیا تھا کہ میں جب بھی 5 آؤٹ کروں گا آپ کے نام کروں گا اور آپ اس دن مجھے ٹی وی پر دیکھیں گی تو آپ کو بہت خوشی ہوگی۔
فاسٹ بولر کا کہنا تھا کہ بدقسمتی سے وہ آج مجھے دیکھ نہیں سکتیں لیکن آج تک والدہ ہر سیکنڈ میرے ذہن میں رہتی ہیں اور میں یہ پرفارمنس انہی کے نام کروں گا، میں پرفارم کروں یا نہ کروں مجھے محسوس ہوتا ہے کہ میں والدہ سے بات کررہا ہوں۔
.@iNaseemShah talks about dedicating his match-winning performance to his late mother and gaining confidence from his spell today.#PAKvNZ | #TayyariKiwiHai pic.twitter.com/iGxnW8GWBT
— Pakistan Cricket (@TheRealPCB) January 9, 2023
پاکستان کی جیت کے حوالے سے بات کرتے ہوئے نسیم شاہ کا کہنا تھا کہ ہر میچ میں بولنگ کو انجوائے کرتا ہوں تاہم پہلے اوور میں وکٹس اعتماد بڑھاتی ہے لیکن ہم صرف کوشش کرتے ہیں نتیجہ اللہ کی طرف سے آتاہے۔
فاسٹ بولر کا کہنا تھا کہ میں اپنی پوری محنت کرتا ہوں، گراؤنڈ میں اپنا سو فیصد دیتا ہوں، اگر ہیٹ ٹرک نصیب میں ہوئی تو ضرور ہوگی۔
نسیم شاہ کا مزید کہنا تھا کہ ٹیسٹ فارمیٹ میں تبدیلی ہوئی جس کی وجہ سے میرے لیے ون ڈے کی بولنگ آسان ہوئی اب کوشش ہے کہ ون ڈے بولنگ میں بہتری لاکر ون ڈے فارمیٹ میں بہترین بولر بن جاؤں۔
واضح رہے کہ گزشتہ روز نیوزی لینڈ کے خلاف پہلے ون ڈے میں پاکستان کے ابھرتے ہوئے اسٹار فاسٹ بولر نسیم شاہ نے ون ڈے انٹرنیشنل میں نیا ریکارڈ قائم کیا۔
نسیم شاہ ابتدائی 4 ون ڈے میں 15 وکٹیں لینے والے پہلے بولر بن گئے ہیں۔
