The news is by your side.

Advertisement

اب کوئی بھی فرد لامحدود لائسنس اور ہتھیار رکھ سکے گا، ناصرحسین شاہ

نجی اسکول گرمیوں کی تعطیلات میں جو فیس لے رہے ہیں یہ غلط ہے، میڈیا سے گفتگو

کراچی: سندھ کے وزیر اطلاعات سید ناصر حسین شاہ نے کہا ہے کہ اب کوئی بھی فرد لامحدود لائسنس اور ہتھیار رکھ سکے گا۔

تفصیلات کے مطابق ان خیالات کا اظہار انھوں نے سندھ کابینہ اجلاس میں شرکت کے بعد اجلاس میں ہونے والی کارروائی سے متعلق میڈیا سے گفتگو کرتے ہوئے کیا۔

انھوں نے کہا کہ سندھ کابینہ نے اسلحہ ایکٹ میں ترامیم کی منظوری دے دی ہے، چار سے زائد اسلحہ نہ رکھنے کی پابندی ختم کردی گئی ہے، لائسنس کی کمپیوٹرائزیشن کرانے میں دسمبر 2018 تک توسیع کی گئی ہے۔

ناصر شاہ نے کہا کہ نجی اسکول گرمیوں کی تعطیلات میں جو فیس لے رہےہیں وہ غلط ہے،کابینہ نے نجی اسکولوں کی بھاری فیسوں پر تشویش کا اظہار کیا ہے۔

انھوں نے کہا کہ اس معاملے پر قانون سازی کے لیے وزیر و سیکرٹری تعلیم کو ہدایت کی گئی ہے، اس سلسلے میں عدالت میں چلنے والے کیس میں حکومت سندھ سفارشات بھی دے گی۔

وزیر اطلاعات سندھ کا کہنا تھا کہ گورنر کے واپس کیے گئے بل دوبارہ منظور کیے گئے، زرعی ٹیکس اور آرمڈ بل کی منظوری دی گئی۔ پچاس ایکڑ زمین اور بارہ لاکھ آمدنی پر زرعی ٹیکس لگایا گیا ہے۔

سید مراد علی شاہ  کی زیر صدات سندھ کابینہ کا اجلاس


ان کا کہنا تھا کہ پیپلز پارٹی نے ہمیشہ جمہوریت کی بات کی ہے، ہم کسی غیر جمہوری عمل کا حصہ نہیں بنیں گے، آصف زرداری نے اپنے دور صدارت میں اختیارات اسمبلی کو دیئے۔

واضح رہے کہ سندھ کابینہ کا اجلاس وزیر اعلیٰ سندھ کی صدارت میں منعقد ہوا تھا جس میں گزشتہ روز پریس کلب پر خواتین پر تشدد کا بھی نوٹس لیا گیا، وزیر اعلیٰ سندھ نے 2 رکنی وزارتی کمیٹی بھی تشکیل دی جس میں وزیر داخلہ سندھ سہیل انور سیال اورناصر شاہ شامل ہیں۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں