کراچی : اداکارہ نتاشا علی نے اے آر وائی ڈیجیٹل کے پروگرام گڈ مارننگ پاکستان میں شرکت کی اور میزبان ندا یاسر کے مختلف سوالات کے جوابات دئیے۔
شوبز انڈسٹری کی معروف اداکارہ و ماڈل نتاشا علی نے کہا کہ ان کا گھر لاہور میں ہے جبکہ وہ شوہر کے ساتھ اسلام آباد میں مقیم ہیں اور ان کے سسرال والے بھی کراچی کے رہائشی ہیں۔
نتاشا علی کا کہنا تھا کہ وہ تین ماہ سے شوبز انڈسٹری سے دور ہیں لیکن اب بہت جلد مداح انہیں ڈراموں میں دیکھیں گے۔
اداکارہ کا کہنا تھا کہ شوہر کی طرف سے ڈراموں میں کام کرنے پر کوئی پابندی نہیں ہے، مجھے خود ابھی یہ لگتا ہے کہ کم ڈراموں میں کام کروں۔
نتاشا علی کا کہنا ہے کہ ان کی شادی کورونا کے دوران بہت سادگی سے انجام پائی جس میں عزیز و اقارب نے شرکت کی۔
انہوں نے کہا کہ چونکہ میری شادی کے فوراً بعد محرم کا مہینہ شروع ہوگیا اس لیے ہم نے کسی قسم کی تقریبات یا خوشیاں نہیں منائی، شادی سے دو ماہ پہلے تک میں بہت پرجوش تھی لیکن پھر محرم کے باعث بعد میں بھی کوئی تقریب منعقد نہیں کی۔
واضح رہے کہ اداکارہ نتاشا علی گزشتہ سال اگست میں رشتہ ازدواج میں منسلک ہوئی تھیں۔