The news is by your side.

Advertisement

یوم پاکستان آج شایان شان طریقے سے منایا جارہا ہے

اسلام آباد: قوم ملک کی ترقی اور استحکام کیلئے انتھک جدوجہد کے عزم کی تجدید کے ساتھ یوم پاکستان جوش و جذبے کے ساتھ منارہی ہے۔

تفصیلات کے مطابق آج دن کا آغاز وفاقی دارالحکومت میں 31 اور صوبائی دارالحکومتوں میں 21-21 توپوں کی سلامی سے ہوا، نماز فجر کے بعد مساجد میں ملک کی ترقی، خوشحالی اور یکجہتی کیلئے خصوصی دعائیں مانگی گئیں۔

یہ دن 1940ء میں آج ہی کے دن تاریخی قرار داد لاہور کی منظوری کی مناسبت سے منایا جاتا ہے جس نے جنوبی ایشیاء کے مسلمانوں کے لئے علیحدہ مادر وطن کے مقصد کو حقیقت کا روپ دینے کیلئے لائحہ عمل فراہم کیا۔

کراچی میں بابائے قوم قائد اعظم محمد علی جناح اور لاہور میں شاعر مشرق علامہ اقبال کے مزار پر گارڈز کی تبدیلی کی سادہ اور پُروقار تقریبات منعقد کی جارہی ہیں۔یوم پاکستان کی مناسبت سے ہر سال شکر پڑیاں گراؤنڈ اسلام آباد میں مسلح افواج کی شان دار پریڈ کا انعقاد ہوتا ہے، اس سال بھی مسلح افواج نے پریڈ کے لیے بھرپور تیاریاں کیں، پاک فضائیہ کے طیاروں نے وفاقی دارالحکومت کی فضاؤں میں ریہرسل بھی کی۔

مگر اسلام آباد اور راولپنڈی میں وقفے وقفے سے بارش کا سلسلہ جاری ہے جبکہ محکمہ موسمیات نے آئندہ 24 گھنٹے کے دوران مزید بارش کی پیشگوئی کی ہے۔

آئی ایس پی آر کے مطابق موسم کی صورت حال کے پیش نظر یوم پاکستان کے موقعے پرہونے والی پریڈ 23 مارچ کے بجائے 25 مارچ کو منعقد کی جائے گی۔

یوم پاکستان کی مناسبت سے ایوانِ صدر میں آج پُروقار تقریب منعقد کی جائے گی جس میں صدر عارف علوی مختلف شعبوں میں نمایاں کارکردگی کی حامل شخصیات میں اعزازات اور تمغے تقسیم کریں گے۔

مزار اقبال پر گارڈز کی تبدیلی کی پُر وقار تقریب

یوم پاکستان کے مناسبت سے لاہور میں مزار اقبال پر بھی گارڈز کی تبدیلی کی پر وقار تقریب منعقد کی گئی، جہاں پاک فضائیہ کےچاق وچوبند دستےنے مزاراقبال پر گارڈز کےفرائض سنبھالے، ائیر وائس مارشل ندیم اختر خان تقریب کے مہمان خصوصی تھے۔

گورنر و وزیراعلیٰ سندھ کی مزار قائد پر حاضری 

ادھر کراچی میں وزیراعلیٰ سندھ مراد علی شاہ نے یوم پاکستان کے موقع پر بابائے قوم کی مزار پر حاضری دی ، وزیراعلیٰ سندھ نے مزار قائد پر گورنر سندھ عمران اسماعیل کا استقبال کیا۔وزیراعلیٰ سندھ نے مزار پر پھولوں کی چادر چڑھائی اور فاتحہ خوانی کی۔

 

Comments

یہ بھی پڑھیں