راولپنڈی: نیشنل ٹی 20 کپ میں شاندار سنچری اسکور کرکے سلیکٹرز کی توجہ اپنی جانب مبذول کروانے والے خوشدل شاہ ہارڈ ہٹر آصف علی کے لیے خطرہ بن گئے۔
تفصیلات کے مطابق ملک میں جاری نیشنل ٹی ٹوینٹی کپ میں کئی بیٹسمین سامنے آئے ہیں جن میں خوشدل شاہ، حیدر علی، ذیشان ملک، عبداللہ شفیق نمایاں ہیں، ان کھلاڑیوں کی کارکردگی کو سابق کرکٹرز سمیت مداحوں کی جانب سے بھی بھرپور پذیرائی ملی ہے۔
ٹی ٹوینٹی ورلڈ کپ قریب ہے اور قومی ٹیم کو شاہد آفریدی عبدالرزاق کے بعد سے کوئی پاور ہٹر نہیں مل سکا ہے، آصف علی پاور ہٹر کے طور پر جانے جاتے ہیں لیکن ان کی کارکردگی میں تسلسل دکھائی نہیں دیتا، دوسری جانب ڈومیسٹک ٹورنامنٹ میں ان کی کارکردگی نمایاں ہے، اب نیشنل ٹی 20 کپ میں سنچری لگا کر اپنی دھاک بٹھانے والے خوشدل شاہ کو ان کے متبادل کے طور پر دیکھا جارہا ہے۔
ذرائع کے مطابق آصف علی کے ساتھ خوشدل شاہ بھی سلیکٹرز کی توجہ حاصل کررہے ہیں، آصف علی بہترین اسٹروکس کھیلنے کی صلاحیت کے ماہر ہیں، نیشنل ٹی ٹوینٹی کپ میں ان کی اوسط بھی بہتر ہے۔
رواں ماہ سے شروع ہونے والی زمبابوے کے خلاف سیریز کے لیے دونوں کھلاڑیوں کو آزمائے جانے کا قومی امکان ہے، زمبابوے اور جنوبی افریقہ کے کارکردگی دیکھ کر ورلڈ کپ کے لیے پاور ہٹر کو منتخب کیا جائے گا۔
