شوبز انڈسٹری کے سینئر اداکار نعمان اعجاز نے مداحوں کو اپنے جعلی فیس بک اکاؤنٹ کے بارے میں خبردار کیا ہے جو ان کے نام سے لوگوں سے مبینہ طور پر پیسے مانگ رہا ہے۔
فوٹو اور ویڈیو شیئرنگ ایپ انسٹاگرام پر اداکار نعمان اعجاز نے جعلی فیس بک پروفائل کا اسکرین شاٹ شیئر کرتے ہوئے فالوورز کو متنبہ کیا ہے کہ وہ اس اکاؤنٹ سے کسی قسم کا رابطہ نہ رکھیں۔
انہوں نے لکھا کہ ’جعلی اکاؤنٹ، پیسے مانگ رہا ہے، برائے مہربانی اسے رپورٹ اور بلاک کریں۔‘
اداکار نے مداحوں سے کہا ہے کہ وہ ہوشیار رہیں اور اس دھوکے کا شکار ہونے سے بچیں۔
واضح رہے کہ نعمان اعجاز کے نام سے چلنے والے اس فیس بک اکاؤنٹ میں اداکار کی تصویر اور تفصیلات کا استعمال کیا گیا ہے۔
یاد رہے کہ حالیہ برسوں میں ہانیہ عامر، ثنا جاوید، بلال عباس اور دیگر نامور شخصیات نے مداحوں کو ان کے نام اور تصاویر کا استعمال کرکے لوگوں سے پیسے مانگنے والے جعلی سوشل میڈیا اکاؤنٹس سے خبردار کیا تھا۔
