اسلام آباد : اسلام آباد رجسٹرارآفس نے سابق نوازشریف کے اشتہارات پیر کے روز اخبارات میں شائع کرنے کا فیصلہ کرلیا اور کہا اشتہارشائع ہونے کے بعد عدالتی حکم کے تحت کارروائی کی جائے گی۔
تفصیلات کے مطابق اسلام آباد ہائی کورٹ میں اشتہار کے ذریعے نواز شریف کی طلبی کے معاملے پر رجسٹرارآفس نے نوازشریف کے اشتہارات پیر کے روز اخبارات میں شائع کرنے کا فیصلہ کرلیا۔
رجسٹرارآفس کا کہنا ہے کہ نوازشریف کیخلاف کرمنل پروسیجر87کےتحت کارروائی کریں گے جبکہ عدالت نے اخبارات میں تشہیر کے بعد کاپی نواز شریف کوارسال کرنے کا حکم دیا۔
رجسٹرارآفس نے مزید کہا کہ سارامعاملہ عدالتی احکامات کے عین مطابق کریں گے، نوازشریف کی طلبی کااشتہار2اخباروں کےکوارٹرپیج پرشائع کیاجائےگا اور اشتہار شائع ہونے کے بعدعدالتی حکم کے تحت کارروائی کی جائے گی۔
گذشتہ روز اسلام آباد ہائیکورٹ کے رجسٹرارآفس نے نوازشریف کی اشتہارات کے زریعے طلبی کے احکامات پرعملدرآمد کرتے ہوئے کارروائی شروع
کی تھی۔
رجسٹرارآفس کے مطابق ڈویژن بینچ کی جانب سےتحریری حکم نامہ آج ملا،نوازشریف کےعدالت طلبی کےاشتہارکل جاری کئے جائیں گے، عدالت عالیہ نے نواز شریف طلبی کا اشتہار 2اخبارات میں جاری کرنے کا حکم دیا تھا ، ڈپٹی اٹارنی جنرل آفس سے اشتہارات کی مد میں 60ہزارروپے ہائی کورٹ رجسٹرارآفس کو مل گئے ہیں۔
یاد رہے اسلام آبادہائی کورٹ نے نواز شریف کے اشتہارجاری کرنے کا حکم دیتے ہوئے کہا تھا کہ 30 دن کے اندر اگر ملزم پیش نہیں ہوتے تو اشتہاری قرار دیا جائے۔
