لاہور: بیگم کلثوم نواز کے انتقال پر ان کی آخری رسومات کی ادائیگی کے لیے اڈیالہ جیل کے تینوں قیدیوں نواز شریف، مریم نواز اور کیپٹن (ر) صفدر کا پیرول کل ختم ہو رہا ہے۔
تفصیلات کے مطابق اڈیالہ جیل میں قید کاٹنے والے سابق وزیر اعظم نواز شریف اپنی بیٹی اور داماد کے ہم راہ پیرول پر رہا ہیں، تینوں قیدیوں کو کل دوپہر دوبارہ اڈیالہ جیل منتقل کر دیا جائے گا۔
پیرول ختم ہونے پر تینوں قیدیوں کو لاہور سے خصوصی طیارے کے ذریعے اسلام آباد پہنچایا جائے گا، ن لیگ کے صدر شہباز شریف اور دیگر پارٹی رہنما بھی اڈیالہ جیل تک ساتھ جائیں گے۔
ذرائع کا کہنا ہے کہ نواز شریف کی والدہ اور چھوٹی بیٹی اسما جاتی امرا میں قیام کریں گی، جب کہ حسن، حسین نواز کی اہلیہ اور بچے بھی جاتی امرا میں قیام کریں گے۔
واضح رہے کہ سابق وزیرِ اعظم اڈیالہ جیل سے اہلیہ بیگم کلثوم نواز کی آخری رسومات کی ادائیگی کے لیے اپنی بیٹی اور داماد کے ساتھ 17 دسمبر تک پیرول پر رہا کیے گئے تھے۔
یہ بھی پڑھیں: بیگم کلثوم نوازکی رسم قل آج جاتی امرا میں ہوگی
یاد رہے کہ بیگم کلثوم نواز کا انتقال 11 ستمبر کو لندن میں گلے کے سرطان کے باعث طویل علالت کے بعد ہوا تھا، ان کی نمازِ جنازہ دو بار ادا کی گئی، ایک بار لندن میں اور دوسری بار جاتی امرا میں، انھیں 14 ستمبر کو میاں شریف کے پہلو میں سپردِ خاک کیا گیا۔
آج جاتی امرا میں مرحومہ بیگم کلثوم نواز کی رسمِ قل بھی ادا کردی گئی، کل نواز شریف اپنی بیٹی اور داماد کے ساتھ قید کی مدت پوری کرنے کے لیے پھر اڈیالہ جیل منتقل کر دیا جائے گا۔
