لودھراں: نواز شریف نے لودھراں میں عوام سے خطاب کرتے ہوئے کہا کہ آپ نے ثابت کیا فیصلے امپائر کی انگلی نہیں عوام کے انگوٹھے کرتے ہیں۔ آپ نے مجھے خرید لیا ہے۔
تفصیلات کے مطابق لودھراں میں مسلم لیگ ن کے جلسے میں خطاب کرتے ہوئے کہا کہ نواز شریف نے کہا کہ خوشی ہے عبد الرحمٰن کانجو اپنے والد کے نقش قدم پر قوم کی خدمت کر رہے ہیں۔ مریم نواز اور حمزہ شہباز دوبارہ لودھراں آئیں گے۔
انہوں نے کہا کہ میں بہت خوش ہوں، آپ نے مجھےخرید لیا ہے۔ میں، شہباز شریف،مریم اور حمزہ کو لے کر آپ کو مبارکباد دینے آیا ہوں۔ آپ نے ثابت کیا فیصلے امپائر کی انگلی نہیں عوام کے انگوٹھے کرتے ہیں۔
انہوں نے کہا کہ 2018 کے الیکشن میں پاکستان کا ہر حلقہ لودھراں بن جائے گا۔ لودھراں کے عوام نے ووٹ کے احترام کو بحال کیا۔ عوام نے 5 سال جھوٹ بولنے والوں کو رد کیا۔ لاڈلے کو 5 سال بعد لودھراں سے سب سیکھنے کا خیال آگیا ہے۔
نواز شریف کا کہنا تھا کہ شہباز شریف نے صرف پنجاب نہیں پاکستان کی خدمت کی ہے۔ ہم نے نہ صرف بجلی دی بلکہ سستی بجلی دی۔ کراچی میں روز ہڑتالیں ہوتی تھیں، مظاہرے ہوتے تھے۔ کراچی کو ہم نے ٹھیک کیا جبکہ حکومت پیپلز پارٹی کی ہے۔
انہوں نے کہا کہ 27 ہزار ووٹ سے ہارے ہو، اللہ سے ڈرو، تکبر نہیں ہونا چاہیئے۔
نواز شریف کا کہنا تھا کہ مجھ پر ایک روپے کی بھی رشوت کا الزام نہیں ہے۔ کچھ نہ ملا تو بیٹے سے تنخواہ نہ لینے پر فارغ کردیا گیا۔
ان کا کہنا تھا کہ کیا آپ کے ووٹ کی حرمت کو اسی طرح پیروں تلے روندا جائے گا۔ اپنے ووٹ کے تقدس کی حفاظت کرو گے یا نہیں؟ کیا آپ کا وزیر اعظم اسی طرح سے ذلیل ہوتا رہے گا؟ جسے آپ وزیر اعظم منتخب کرتے ہیں کیا بار بار اسے اسی طرح نااہل کیا جائے گا۔
انہوں نے کہا کہ جسے جنگلہ بس کہتے رہے آج وہی جنگلہ بس پشاور میں بنا رہے ہیں۔ خیبر پختونخواہ حکومت کی کارکردگی صفر ہے، 5 سال میں میٹرو بس نہیں بنا سکے۔ ہم نے 4 سال گنوائے نہیں بلکہ کام کیا ہے سی پیک لے کر آئے ہیں۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
