The news is by your side.

Advertisement

آئندہ الیکشن میں ن لیگ کا مقابلہ خلائی مخلوق کے ساتھ ہے، نوازشریف

صادق آباد : سابق وزیر اعظم نواز شریف نے کہا ہے کہ ن لیگ کا مقابلہ زرداری کے ساتھ ہے نہ عمران کے ساتھ بلکہ ہمارا مقابلہ خلائی مخلوق کے ساتھ ہے، اب پاکستان کی بدنصیبی کا70سالہ دور دوبارہ نہیں آئے گا۔

ان خیالات کا اظہار انہوں نے صادق آباد میں ایک بہت بڑے جلسہ عام سے خطاب کرتے ہوئے کیا، نواز شریف نے پی ٹی آئی پر شدید تنقید کرتے ہوئے کہا کہ تحریک انصاف تو کوئی شے ہی کچھ نہیں ہے، یہ بلا لے کر نکلنے والے لوگ قوم سے مذاق کررہے ہیں۔

پی ٹی آئی والوں کو کرکٹ کھیلنے کے علاوہ اور کوئی کام نہیں ہے، شاید یہ لوگ میری کرکٹ کے لئے خدمات کو بھی بھول گئے ہیں، یہ لوگ شوکت خانم میموریل کیلئے میری خدمت کو بھی بھول گئے، انہوں نے بتایا کہ میں نے 1990میں شوکت میموریل اسپتال کیلئے جو خدمت کی وہ فرض سمجھ کرکی۔

نواز شریف نے مزید کہا کہ میرا عمران خان سے کوئی مقابلہ نہیں آپ میرے سامنے کوئی شے ہی نہیں ہو اور زرداری صاحب آپ کا بھی مجھ سے کوئی مقابلہ نہیں ہے بلکہ ن لیگ کا مقابلہ ایک خلائی مخلوق کے ساتھ ہے ، اب پاکستان کی بدنصیبی کا70سالہ دور دوبارہ نہیں آئے گا۔

نوازشریف نے کہا کہ میں نے پچھلے 4سال قوم کی خدمت کی اور ملک سے اندھیرے دور کئے، دہشت گردی کو ختم کیا کراچی کا امن بحال کیا، پاکستان کو ایٹمی طاقت بنایا، صادق آباد سے اغواء برائے تاوان کی وارداتیں ختم کیں، موٹرویز بنائی ہیں۔

آپ کو مبارک ہو کراچی تا ملتان موٹروے بھی زیرتعمیر ہے، موٹر وے کو پشاور سے اسلام آباد اور پھر لاہور پہنچائی، لاہور سے موٹروے کوملتان اور پھر سکھر اور کراچی پہنچائیں گے۔

انہوں نے سوال کیا کہ قوم کیلئے اتنی خدمات ہیں کیا اس لئے مجھے فارغ کردیا گیا، دن رات خدمت کرنیوالے کو راہ چلتے چلے فارغ کررہے ہیں، نواز شریف نے شرکاء سے ووٹ دینے کی اپیل کرتے ہوئے ن لیگ کا منشور بھی پیش کیا۔

انہوں نے کہا کہ 2018کے الیکشن کو ریفرنڈم سمجھیں، میرے خلاف فیصلہ بدلنا چاہتے ہو تو ن لیگ کے شیروں کو کامیاب کراؤ، پاکستان کو ایشین ٹائیگر بنانے کےلئے ن لیگ کو ووٹ دو، میرے خلاف فیصلے کو اسمبلی سے ختم یا بدلا جاسکتا ہے تاکہ ہم ترقی کا سفر جاری رکھ سکیں۔

انہوں نے کہا کہ ن لیگ کی حکومت آئی تو پاکستان کے تمام غریبوں کو ہیلتھ کارڈ دینگے، ہمارے منشور میں شامل ہوگا کہ ہر غریب کو چھت اور گھر ملے گا، ن لیگ نے کسانوں کو ٹیوب ویلوں پر سبسڈی دی۔

مزید پڑھیں: بہترہوگازرداری صاحب ذاتی الزام تراشیوں کا دفتر نہ کھولیں ،نوازشریف

ان کا کہنا تھا کہ آج نوازشریف اپنے لئے نہیں بکلہ آپ کے اچھے مستقبل کیلئے آپ کے پاس آیا ہے، میرا ہر اول دستہ بنیں گے تو ملک میں ہرطرف انقلاب برپاکردینگے، الیکشن کے بعد صادق آباد سے ٹلو روڈ دوبارہ تعمیر اور دو رویہ بنائیں گے، صادق آباد سے رحیم یارخان تک سڑک کو بھی دو رویہ کرینگے۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔  

Comments

comments

یہ بھی پڑھیں