The news is by your side.

Advertisement

نگراں حکومت لوڈشیڈنگ کی ذمہ دار ہے‘ نوازشریف

اسلام آباد : سابق وزیراعظم نوازشریف کا کہنا ہے کہ عمرےکے لیے جانا چاہتا ہوں لیکن کیس چل رہا ہے، بیوی کی عیادت کے لیے یہاں سے فرصت ملی توجاسکوں گا۔

تفصیلات کے مطابق اسلام آباد میں احتساب عدالت کے باہرصحافیوں سے غیررسمی گفتگو کرتے ہوئے کہا کہ ہمارے جانے تک کوئی لوڈشیڈنگ نہیں تھی اگر اب لوڈشیڈنگ ہورہی ہے تو اس کی ذمہ دار نگراں حکومت ہے۔

مسلم لیگ ن کے قائد نوازشریف کا کہنا تھا کہ ہم سسٹم میں 10 ہزار میگاواٹ کا اضافہ کرکے گئے اور ہمارے جانے تک کوئی لوڈشیڈنگ نہیں تھی۔

سابق وزیراعظم کا کہنا تھا کہ پارلیمنٹ کے قانون کو سنگل رکنی بینچ کیسے اٹھا کرباہر پھینک دیتا ہے، صحافی نے کہا کہ سپریم کورٹ نے اس فیصلے کو معطل کر دیا ہے جس پرانہوں نے کہا کہ وہ بعد کی بات ہے۔

صحافی نے سوال کیا کہ الزام ہےکہ ریحام خان کی کتاب کے پیچھے ن لیگ ہے؟ جس پر نوازشریف نے کہا کہ اور کچھ نہیں ملا تو یہ الزام لگا دیا۔

ڈی جی آئی ایس پی آر کی پریس کانفرنس سے متعلق سوال کے جواب میں سابق وزیراعظم کا کہنا تھا کہ ڈی جی آئی ایس پی آر کی پوری پریس کانفرنس نہیں سنی مجھے نہیں پتہ کہ کیا کہا ہے۔

مسلم لیگ ن کے قائد کا کہنا تھا کہ ماضی میں بار بار گرے ہیں اب سنبھلنا چاہیے انہوں نے ایک شعربھی پڑھا۔


جو ٹھوکر نہ کھائے نہیں جیت اس کی
جوگرکرسنبھل جائے ہے جیت اس کی

Comments

comments

یہ بھی پڑھیں