The news is by your side.

Advertisement

پھانسی دے دی جائے، مگر ووٹ کی عزت پامال نہیں ہونے دوں گا: نواز شریف

مجھے غدار کہنے والو، حساب کتاب کے لئے قومی کمیشن بنا دو

بونیر:سابق وزیراعظم نواز شریف نے کہا ہے کہ پورا پاکستان ترقی کررہا ہے، لیکن خیبرپختونخواہ ترقی نہیں کررہا، عمران خان راستہ نہ روکتے، تو کے پی میں بھی موٹروے بن چکی ہوتی.

ان خیالات کا اظہار انھوں نے بونیر میں جلسہ عام سے خطاب کرتے ہوئے کیا، ان کا کہنا تھا کہ عوام جانتے ہیں کہ دہشت گردی کس نے ختم کی.

ایسا نظام لائیں گے کہ کسی کی ہمت نہیں ہوگی کہ آیندہ ووٹ کو پاؤں تلے روندے، اس شخص کوغدارکہا گیا جو ملک کے لئے جیتا اور مرتا ہے

نواز شریف

میاں‌ نواز شریف کا کہنا تھا کہ کے پی میں ہماری حکومت ہوتی، تو موٹروے یہاں پہنچ چکی ہوتی، دہشت گردوں کی آنکھوں میں آنکھ ڈال کر دہشت گردی ختم کی، کراچی میں امن قائم کیا، لیکن پیپلزپارٹی نے کچھ نہیں کیا.

انھوں‌ نے کہا کہ جو ایٹمی دھماکے کرتا ہے، آج اسے ہی غدار کہا جارہا ہے، کیا پاکستان کو ایٹمی قوت بنانا غداری ہے، بیٹے سے تنخواہ نہ لینے پرچھٹی کر دی، ملک کو اندھیرے میں ٖڈبونے والے، آئین توڑنے والے محب وطن ہیں؟ الٹی گنگا بہہ رہی ہے، اس کے آگے بند باندھیں گے.

ان کا کہنا تھا کہ کارگل کی رسوائی جھیلنے والے کو آج غدار کہا جاتا ہے، مجھے اس لیے غدارکہا جاتا ہے، کیوں کہ میں کہہ رہا ہوں، پاکستان تنہا ہوتا جارہا ہے، پاکستان کے لئے کوئی اچھی بات یا مشورہ دینا چاہے، تو اعتراض نہیں ہونا چاہیے، ملک پر کسی کی اجارہ داری نہیں، 22 کروڑعوام کا ملک ہے۔

انھوں‌ نے کہا کہ مجھے غدار کہنے والو، حساب کتاب کے لئے قومی کمیشن بنا دو، قومی کمیشن اپنی رپورٹ میں جسے مجرم کہے، اسے سرعام پھانسی دے دی جائے، مگر ووٹ کی عزت پامال نہیں ہونے دوں گا.

انھوں‌ نے کہا کہ میرا بیانیہ آج گھرگھر پہنچ رہا ہے، ووٹ کی عزت پامال نہیں ہونے دوں گا، نوازشریف کوغدار کہنے والا سب سے بڑاغدار ہوگا۔

انھوں نے کہا کہ الزام لگایا گیا کہ نوازشریف نے منی لانڈرنگ کر کے رقم بھارت بھیجی، منی لانڈرنگ کے الزام پربھی قومی کمیشن بننا چاہیے، اس قومی کمیشن میں چیئرمین نیب کوبھی بلانا چاہیے. چیئرمین نیب الزام ثابت نہیں کرسکے، تو اس پر معافی مانگیں.

انھوں نے مزید کہا کہ ایسا نظام لائیں گے کہ کسی کی ہمت نہیں ہوگی کہ آیندہ ووٹ کو پاؤں تلے روندے، اس شخص کوغدارکہا گیا جو ملک کے لئے جیتا اور مرتا ہے، انھوں نے کہا کہ میراوعدہ ہے ووٹ کی عزت ہرصورت بحال کریں گے، سندھ اوربلوچستان بھی جاؤں گا.بونیربتارہاہے2018 مسلم لیگ ن کا سال ہوگا.


قومی سلامتی کمیٹی نے نوازشریف کا بیان متفقہ طور پر مسترد کردیا


خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

Comments

comments

یہ بھی پڑھیں