لاہور : سروسزاسپتال میں زیرعلاج نواز شریف کو سینے میں درد کی شکایت ہوئی ، جس کے بعد آکسیجن لگادی گئی، انھیں سانس لینے میں دشواری کا بھی سامنا ہے، نوازشریف کے دل کے ٹیسٹ ٹروپ ٹی، ٹروپ آئی کی رپورٹ پازیٹو آئی۔
تفصیلات کے مطابق سابق وزیراعظم نواز شریف میں ہارٹ اٹیک کی ابتدائی علامات ظاہر ہونا شروع ہوگئیں ہیں ، ان کا ٹراپ آئی ٹیسٹ پازیٹیو آگیا، ذرائع میڈیکل بورڈ کا کہنا ہے کہ انھیں سینے میں درد کی شکایت ہے اور کبھی کبھی سانس لینےمیں دشواری کابھی سامنا ہے۔
زرائع کا کہنا ہے کہ نوازشریف کوایک طرف پلیٹ لیٹس کی کمی کا بھی سامنا ہے ، دوسری طرف دل کے عارضے کا پرانا مسئلہ ہے ، ڈاکٹرز نے نواز شریف کو خون پتلا کرنے والی دوا لوپرن کا استعمال شروع کرادیا ہے جبکہ نواز شریف کی ایکوکارڈیو گرافی اور ای سی جی رپورٹ قدرے بہترہے۔
میڈیکل بورڈ نے آئی وی آئی جی انجیکشنز کا ٹریٹمنٹ جاری رکھنے کا فیصلہ کیا ہے، 4 سے 5 روز تک انجیکشنز کا کورس جاری رکھاجائے گا۔
گزشتہ روز میڈیکل بورڈ نے انجائنا کے درد کی وجہ سے دل کے ٹیسٹ تجویز کئے تھے اور کہا تھا کہ دل کےعارضےکےباعث ٹروپ ٹی اورٹروپ آئی پازیٹوآسکتاہے ،نوازشریف 18سال سےدل کےعارضہ میں مبتلا ہیں۔
مزید پڑھیں : ڈاکٹر طاہر شمسی کا نواز شریف کی صحت سے متعلق بڑا انکشاف
نوازشریف گردوں ، شوگراوربلڈپریشرکےعارضے میں بھی مبتلا ہیں، ان کی2بار انجیوپلاسٹی،2باراوپن ہارٹ سرجری ہوچکی ہے جبکہ کولیسٹرول اور جوڑوں کے درد کا بھی سامنا ہے۔
گذشتہ روز ماہرامراض ہیماٹالوجسٹ ڈاکٹر طاہر شمسی نے نواز شریف کی صحت کے بارے میں انکشاف کرتے ہوئے کہا تھا کہ خوشی کی بات یہ ہےکہ نواز شریف کو کینسر نہیں ہے، ان کا کابون میروفنکشنل ہے۔
میڈیکل بورڈ کے سربراہ ڈاکٹر محمود ایاز کا کہنا تھا کہ نوازشریف کے ضروری ٹیسٹ کرالئے گئے ہیں، اُن کا پی ای ٹی اسکین اب دو سے تین روز بعد کیا جائےگا، نوازشریف کوآٹوامیون ڈس آرڈرہے، اُنہیں آئی وی آئی جی انجکشنز پر رکھا گیا ہے، جس سے ان کا ہیموگلوبن بہترہوگا، جس کی افادیت دو سے تین روز میں ظاہر ہوگی۔
خیال رہے برطانوی ڈاکٹرز نے نواز شریف کی میڈیکل اور بلڈ رپورٹ دیکھنے کہ بعد ان کی صحت کو تشویشناک قرار دیا تھا اور نواز شریف کے پلیٹ لیٹس کم ہونے کی وجوہات جاننے کیلئے طبی ماہرین نے چیک اپ کیلئے انہیں بیرون ملک منتقل ہونے کا مشورہ دیا، ڈاکٹرز کا کہنا تھا کہ بیماری کی تشخیص کے بعد ہی علاج شروع کیا جاسکتا ہے۔
