The news is by your side.

Advertisement

اتوار کو نواز شریف کے دانتوں کا معائنہ کیا جائے گا

لندن: سابق وزیر اعظم نواز شریف کے دانتوں کا معائنہ کل بہ روز اتوار کیا جائے گا۔

تفصیلات کے مطابق گزشتہ رات نواز شریف کو اسپتال لے جایا گیا تھا جہاں ان کا چیک اپ کرایا گیا، سابق وزیر اعظم کے صاحب زادے حسین نواز نے کہا کہ اتوار کے دن ان کے والد کے دانتوں کا معائنہ کیا جائے گا۔

حسین نواز نے بتایا کہ پیر کو نواز شریف کا کارڈیک پی اے ٹی اسکین بھی کیا جائے گا۔

دریں اثنا، نواز شریف سے پرویز مشرف کے خلاف فیصلے سے متعلق صحافی کے سوال پر نواز شریف خاموش رہے، غیر رسمی گفتگو کرتے ہوئے حسین نواز نے کہا کہ نواز شریف کو فیصلے سے آگاہ کر دیا گیا تھا، ہم اسپتال میں تھے جب یہ فیصلہ آیا، نواز شریف نے کہا میں نے معاملہ اللہ پر چھوڑ دیا ہے۔

یہ بھی پڑھیں:  نواز شریف کوعلاج کے لیے امریکا لے جایا جائے گا، ڈاکٹر عدنان

خیال رہے کہ طبی بنیادوں پر ضمانت پر رہائی کے بعد نواز شریف کو علاج کے لیے لندن منتقل کیا گیا ہے، جہاں ان کا علاج جاری ہے، تاہم ان کے ذاتی معالج ڈاکٹر عدنان نے کہا تھا کہ انھیں زیادہ بہتر علاج کے لیے امریکا منتقل کیا جائے گا۔

ذاتی معالج نے کہا تھا کہ نواز شریف کے دماغ کو خون دینے والی شریان میں اسٹنٹنگ کی جائے گی، ان کا 6 مختلف اسپتالوں میں علاج جاری ہے۔ ایماٹولوجسٹ ٹیم نے انھیں صحت مند قرار نہیں دیا، ان کے دل اور شریانوں کا مسلسل معائنہ کیا جا رہا ہے، پلیٹ لیٹس متوازن ہونے تک کوئی پروسیجر نہیں کیا جا سکتا، پلیٹ لیٹس گرنے کی وجوہ معلوم کرنا چیلنج بن گیا ہے۔

انھوں نے مزید کہا تھا کہ برطانوی ڈاکٹرز نواز شریف کی بیماری کی تشخیص ابھی تک نہیں کر سکے ہیں، وہ کتنے دن برطانیہ میں رہیں گے کچھ کہنا ممکن نہیں ہے۔

Comments

یہ بھی پڑھیں