کیلی فورنیا: ہالی ووڈ اداکارہ نایا ریویورا امریکی ریاست کیلی فورنیا کے شہر لاس اینجلس کے قریب ایک جھیل میں سیر کرنے کے دوران لاپتا ہوگئی تھیں، ریسکیو حکام نے خدشہ ظاہر کیا ہے کہ اداکارہ کی لاش ہوسکتا ہے کبھی نہ ملے۔
تفصیلات کے مطابق ہالی ووڈ اداکارہ نایا ریویرا 8 جولائی کی دوپہر اپنے 4 سالہ بیٹے کے ساتھ لاس اینجلس سے 45 میل دور واقع پیرو جھیل کی سیر کرنے پہنچی تھیں اور لاپتا ہوگئی تھیں تاہم اب حکام نے خدشہ ظاہر کیا ہے کہ ممکنہ طور پر اداکارہ کی لاش بھی کبھی نہیں مل پائے گی اور اگر ان کی لاش ملی بھی تو وہ دوسری جھیل سے ملے گی۔
ریسکیو حکام کا کہنا ہے کہ ہوسکتا ہے اداکارہ کی لاش اندر پانی میں کسی چیز میں پھنس گئی ہوگی جس کی وجہ سے تلاش میں مشکلات پیش آرہی ہیں۔
رپورٹ کے مطابق مذکورہ جھیل میں نہانے پر مکمل پابندی نہیں ہے تاہم جھیل کا پانی بہت زیادہ ٹھنڈا ہونے کی وجہ سے نہانے والے بعض افراد بری طرح متاثر ہوسکتے ہیں۔
ریسکیو حکام کے مطابق اب تک انہیں اداکارہ کی لاش کی تلاش کے معاملے میں کوئی اہم پیش رفت نہیں ہوئی ہے، اگر اداکارہ کی لاش ملی بھی تو وہ اسی جھیل سے نہیں ملے گی جہاں اداکارہ نہانے کے لیے اتری تھیں، اداکارہ کی لاش کسی دوسری جھیل سے مل سکتی ہے تاہم اس کے امکانات بہت کم ہیں۔
واضح رہے کہ ادکارہ نایا ریویرا نے بطور چائلڈ آرٹسٹ کیریئر کا آغاز کیا تھا تاہم انہوں نے فلموں میں اداکاری کی شروعات 2011 میں کی تھی، انہیں شہرت میوزیکل ڈراما ’گلی‘ سے ملی تھی ۔
