پی پی رہنما نذرگوندل کا پی ٹی آئی میں شمولیت کا باضابطہ اعلان -
The news is by your side.

Advertisement

پی پی رہنما نذرگوندل کا پی ٹی آئی میں شمولیت کا باضابطہ اعلان

پی ٹی آئی نے پنجاب میں پیپلز پارٹی کی ایک اور وکٹ گرادی۔ پیپلزپارٹی کے سینئر رہنما نذر محمد گوندل نے نتھیا گلی جاکر عمران خان سے ملاقات کر کےتحریک انصاف میں شمولیت کا باضابطہ اعلان کردیا۔

تفصیلات کے مطابق تحریک انصاف نے پیپلز پارٹی کی ایک وکٹ گرادی، پیپلز پارٹی کے سینیئر رہنما نذر محمد گوندل نے تحریک انصاف میں باقاعدہ شمولیت اختیار کرلی، انہوں نے نتھیا گلی میں چیئرمین پی ٹی آئی عمران خان کے ساتھ ایک پریس کانفرنس میں کہا کہ بھاری دل کے ساتھ پیپلزپارٹی کو خیر باد کہہ رہا ہوں۔

اس موقع پر پی ٹی آئی کے رہنما شاہ محمود قریشی جہانگیر ترین، فردوس عاشق اعوان اور دیگر بھی موجود تھے، پریس کانفرنس سے خطاب کرتے ہوئے عمران خان نے نذر گوندل کی پارٹی میں شمولیت کا خیر مقدم کرتے ہوئے کہا کہ نذر گوندل کو پارٹی میں خوش آمدید کہتا ہوں۔

انہوں نے بتایا کہ نون لیگ کے دیگر لوگ بھی ہم سے رابطے کر رہے ہیں لیکن خوف کے باعث پارٹی میں شامل نہیں ہو رہے۔ پی ٹی آئی چیئرمین نے نون لیگ کو سپریم کورٹ پر حملہ کرنے والی جماعت قرار دیا۔

عمران خان نے کہا کہ پی ٹی آئی کی ملک میں تبدیلی کا مطلب جمہوری اداروں کی مضبوطی ہے، ایک سیاسی مافیا نے اداروں کو تباہ کردیا ہے، کرپٹ مافیا کے گاڈفادر نوازشریف ہیں، عوام کی خدمت کے نام پر قومی خزانے کو لوٹا جا رہا ہے، سپریم کورٹ پرحملہ،ججزکو خریدنے کی کوشش ن لیگ کی تاریخ ہے۔

ان کا کہنا تھا کہ حکمران سپریم کورٹ طرز کے حملے کی تیاری کررہے ہیں، حکمرانوں کو تنبیہ کرتا ہوں یہ 1997نہیں ہے، شریف خاندان مشرف دور میں ڈیل کرکے بھاگ گیا تھا، فیصلہ عوام کریں کہ اسٹیٹس کو کے ساتھ چلنا ہے یا تبدیلی کے ساتھ؟


مزید پڑھیں : پیپلزپارٹی کے سینئر رہنما نذر گوندل کا پی ٹی آئی میں شمولیت کا فیصلہ


پہلی مرتبہ شریف خاندان کا احتساب ہو رہا ہے، ان کو پتہ ہے قطری گواہی دینے نہیں آ رہا ان کا سارا کیس ختم ہے، پاکستان میں نئی تاریخ بن رہی ہے، قانون کے سامنے سب ایک ہیں۔

یاد رہے کہ نذر محمد گوندل نے گزشتہ روز اے آروائی نیوز کے پروگرام الیونتھ آور میں گفتگو کرتے ہوئے پیپلز پارٹی چھوڑنے کا اعلان کیا تھا۔ ان کا کہنا تھا کہ پیپلزپارٹی چھوڑنے کا فیصلہ کرنے کے بعد پی ٹی آئی میں شمولیت کا اعلان بھی جلد کروں گا۔

Comments

comments

یہ بھی پڑھیں