اسلام آباد: نیشنل کنٹرول اینڈ آپریشن سینٹر (این سی او سی) اجلاس میں 5 سے 20 مئی تک پاکستان آنے والی پروازوں پر پابندی کا فیصلہ کیا گیا ہے۔
اے آر وائی نیوز کی رپورٹ کے مطابق وفاقی وزیر اسد عمر کی زیر صدارت این سی او سی کا اجلاس ہوا جس میں 40 سے 49 سال کی عمر کے افراد کی تین مئی سے ویکسینیشن شروع کرنے کا فیصلہ کیا گیا، اجلاس میں 5 سے 20 مئی تک پاکستان آنے والی پروازوں پر پابندی کا فیصلہ کیا گیا۔
ذرائع کے مطابق اجلاس میں 18 مئی کو پروازوں پر پابندی سے متعلق دوبارہ جائزہ لیا جائے گا، اجلاس میں آکسیجن کی پیداوار اور دستیابی سے متعلق امور پر بھی غور کیا گیا۔
عید کی تعطیلات میں انٹرسٹی اور بین الصوبائی ٹرانسپورٹ پر بھی پابندی ہوگی، عید کی تعطیلات میں تمام سیاحتی مراکز بھی بند رہیں گے۔
مزید پڑھیں: وفاقی حکومت نے عید الفطر کی تعطیلات کا اعلان کردیا
این سی او سی نے عید کی تعطیلات میں شہریوں سے گھروں پر رہنے کی ہدایت کی، 5 ہزار میٹرک ٹن آکسیجن اور 5 ہزار آکسیجن سلنڈر درآمد کرنے کا فیصلہ کیا گیا۔
واضح رہے کہ کورونا وبا کی تیسری لہر کے باعث وفاقی حکومت نے عید الفطر کے موقع پر زائد تعطیلات دے دی ہیں، جمعتہ الوداع، نماز عید کیلئے گائیڈ لائنز یکم مئی کو جاری کرنے کا فیصلہ کیا ہے۔
اعلامیے کے مطابق عید الفطر کی تعطیلات دس تا پندرہ مئی تک ہوں گی، عید پر لازمی سروسز کےعلاوہ کاروبار،مارکیٹس اور دکانیں بند رہیں گی، گروسری، میڈیکل اسٹور،اسپتال،ویکسی نیشن سینٹر، بیکریز، پیٹرول پمپس، چکن، سبزی، فروٹ شاپس کھلی رہیں گی جبکہ چاند رات کو مہندی بازار،جیولری، کپڑوں کے اسٹال بند رہیں گے۔