The news is by your side.

Advertisement

این سی او سی کا کراچی میں کورونا کیسز کی شرح میں اضافے پر تشویش کا اظہار

اسلام آباد : نیشنل کمانڈ اینڈ آپریشن سنٹر ( این سی او سی ) نے کراچی میں کورونا وائرس کے کیسز کی شرح میں اضافہ پر تشویش کا اظہار کیا ، معاون خصوصی ڈاکٹر فیصل سلطان نے کہا کہ کورونا وبا کو روکنے کیلئے اسمارٹ لاک ڈاؤن کیا جائے۔

تفصیلات کے مطابق نیشنل کمانڈ اینڈ آپریشن سنٹر میں کورونا صورتحال کے حوالے سے اجلاس ہوا ، جس میں کراچی میں کورونا کیسز کی صورت حال پر بریفنگ دی گئی۔

بریفنگ میں بتایا گیا کہ کراچی میں کورونا کے کیسز بڑھ رہے ہیں، ملک میں کورونا کے 747 کیسز میں 365صرف کراچی کے ہیں، ،جوانتہائی تشویشناک بات ہے ، این سی او سی کے اجلاس میں کراچی میں کورونا وائرس کے کیسز کی شرح میں اضافہ پر تشویش کا اظہار کیا گیا۔

معاون خصوصی ڈاکٹر فیصل سلطان نے کہا کہ کوروناوبا کو روکنے کیلئے اسمارٹ لاک ڈاؤن کیاجائے ، متاثرین تک رسائی اور ہیلتھ پروٹوکولز سے ہی وائرس روکا جاسکتا ہے۔

سیکریٹری ہیلتھ سندھ نے بریفنگ میں کہا کہ شہری انتظامیہ صورتحال مانیٹر کررہی ہے، اسٹیک ہولڈرز کی مشاورت سے مناسب انتظامات کئے جائیں گے۔

دوسری جانب کراچی انتظامیہ بھی حرکت میں آگئی ہے، سندھ حکومت نے کورونا متاثرین میں اضافہ کے بعد مائیکرو اسمارٹ لاک ڈاؤن لگانے کا فیصلہ کیا ہے، اس حوالے سے محکمہ صحت نے ڈپٹی کمشنروں، ایڈیشنل آئی جی اورایس ایس پی پولیس کو لکھے گئے خط میں کوروناایس اوپیز پر سختی سے عملدرآمد کرانے اور کورونا سے زیادہ متاثرہ علاقوں میں مائیکرو اسمارٹ لاک ڈاؤن لگانے کی ہدایت کردی ہے۔

خط میں کہا گیا ہے کہ مائیکرواسمارٹ لاک ڈاؤن کیلئے علاقوں میں پولیس تعینات کی جائے۔

Comments

یہ بھی پڑھیں