لاہور : این ڈی ایم اے نے کورونا کی تشویشناک صورتحال کے پیش نظر پنجاب کے اسپتالوں کو 124 مزید وینٹی لیٹرز فراہم کر دئیے۔
تفصیلات کے مطابق پنجاب میں کورونا وائرس کے انتہائی تشویشناک مریض بڑھنے لگے، جس کے پیش نظر این ڈی ایم اے نے پنجاب کے اسپتالوں کو 124 مزید وینٹی لیٹرز فراہم کر دئیے۔
پنجاب کے 11 ٹیچنگ اسپتالوں میں وینٹی لیٹرز کی تنصیب کا کام شروع کر دیا گیا جبکہ لاہور کے اسپتالوں کو 70 وینٹی لیٹرز فراہم کر دئیے گئے۔
سر گنگارام اسپتال میں 10،جناح اسپتال میں 10، میو اسپتال کو 14 ، لاہور جنرل اسپتال کو 20اور سروسز اسپتال کو 16 وینٹی لیٹرز فراہم کئے گئے۔
اسی طرح نشتر اسپتال ملتان کو 18، ڈی ایچ کیو اسپتال فیصل آباد اور ڈی ایچ کیو اسپتال گوجرانوالہ کو 8 وینٹی لیٹرز دئیے گئے۔
خیال رہے پنجاب کے دارلحکومت لاہور کے سرکاری اسپتالوں میں کرونا کے مختص بیڈز کم پڑنے لگے ہیں اور اسپتالوں کے وینٹی لیٹرز 88.50 فیصد تک بھر گئے ، جس کے باعث مریضوں کو وینٹی لیٹرز کے حصول کیلئے شدید مشکلات کا سامنا ہے۔
شہر میں کرونا مریضوں کیلئے 475 آکسیجن بیڈز مختص کیے گئے ہیں، جس میں سے 66.20 فیصد تک آکسیجن بیڈز بھر گئے ہیں۔
