واشنگٹن: امریکا میں کرونا فنڈز میں 100 بلین چوری کے انکشاف پر بڑا محاذ کھل گیا ہے۔
غیر ملکی میڈیا رپورٹ کے مطابق کرونا وائرس کے نئے ویریئنٹ کا سامنا کرنے والے امریکا میں کرونا کے امدادی پروگرام میں 100 بلین ڈالرز کی چوری کا انکشاف ہوا ہے، یہ انکشاف انتہائی اہم ادارے یو ایس سیکریٹ سروس کی جانب سے جاری ایک رپورٹ میں کیا گیا ہے۔
سیکرٹ سروس کے مطابق زیادہ تر رقم بیروزگاری الاؤنس میں سے چوری کی گئی، بیروزگاری کی مد میں 87 بلین ڈالر غلط طریقے سےادا کئے گئے، اس دوران فراڈ کے 900 سے زائد کیسزہوئے جبکہ 100 افراد زیر حراست ہیں، گرفتار افراد سے پے چیک پروٹیکشن پروگرام کے تحت 75 ملین ڈالرز کی رقم اور اشیا ضبط کرلی گئیں ہیں۔
دوسری جانب ترجمان وائٹ ہاؤس نےسیکریٹ سروس کی رپورٹ کو مسترد کرتے ہوئے کہا کہ رپورٹ میں اعداد وشمار پرانے اور کئی غلطیاں ہیں۔
یہ بھی پڑھیں: امریکا میں فائزر کی کرونا دوا کے استعمال کی منظوری دے دی گئی
واضح رہے کہ گذشتہ روز خوراک و ادویات کی امریکی انتظامیہ (ایف ڈی اے) نے کرونا وائرس ختم کرنے والی فائزر کی کووِڈ 19 دوا پیکسلووِڈ کے ہنگامی استعمال کی منظوری دے دی ہے۔
ایف ڈی اے نے بدھ کے روز اعلان کیا تھا کہ وائرس کا خاتمہ کرنے والی دوا پیکسلووِڈ ا 12 سال یا اس سے زائد عمر کے کووِڈ نائنٹین کے ایسے مریضوں کو دی جا سکتی ہے جو شدید بیمار پڑنے کے زیادہ خطرے سے دوچار ہوں۔
امریکی ادارے کا کہنا تھا کہ یہ دوا صرف ڈاکٹرز کی جانب سے نسخہ تجویز کرنے پر ہی دستیاب ہوگا، اور اسے کووِڈ نائنٹین کی تشخیص کے بعد اور علامات شروع ہونے کے 5 دن کے اندر اندر، جس قدر جلد ممکن ہو سکے دیا جانا چاہیے۔
