ریاض: سعودی عرب کی سول ایوی ایشن اتھارٹی کے مطابق رواں حج سیزن میں چار لاکھ 16 ہزار 86 عازمین حج سعودی عرب پہنچ گئے ہیں۔
عرب میڈیا کے مطابق رواں حج سیزن کے آغاز سے اب تک جدہ کے شاہ عبدالعزیز اور مدینہ منورہ کے شہزادہ محمد بن عبدالعزیز ہوائی اڈوں سے چار لاکھ سولہ ہزار چھیاسی عازمین حج سعودی عرب پہنچ چکے ہیں۔
جدہ کے شاہ عبدالعزیز ہوائی اڈے پر ایک لاکھ 17 ہزار 441 عازمین حج 651 حج پروازوں کے ذریعے سعودی عرب پہنچے ہیں، یہ تعداد گزشتہ برس اس عرصے کی نسبت 7 فیصد زیادہ ہے۔
اسی طرح مدینہ منورہ کے شہزادہ محمد بن عبدالعزیز بین الاقوامی ہوائی اڈے پر دو لاکھ 98 ہزار 645 عازمین حج 1359 حج پروازوں کے ذریعے مملکت میں داخل ہوئے ہیں۔
سعودی عرب کی وزارت حج و عمرہ اور ہوائی اڈوں کی انتظامیہ کے درمیان باہمی تعاون سے عازمین حج کو ہر ممکن سہولت اور آرام پہنچانے کے لیے اقدامات کیے جارہے ہیں۔
سعودی عرب کے ہوائی اڈوں پر ایک گھنٹے میں 3800 عازمین حج کی آمد، 3500 کی روانگی، آمد ویٹنگ ہال میں 7000 حجاج کے ٹھہرنے اور 12000 کے پلیٹ فارم کے باہر قیام کے انتظامات کیے گئے ہیں، روزانہ 91 ہزار عازمین حج کی آمد اور 84 ہزار کی واپسی کے انتظامات کیے گئے ہیں۔
