اسلام آباد : پاکستان اور آئی ایم ایف کے درمیان مذاکرات کا آغاز آج سے ہوگا ، آئی ایم ایف کا مشن پہلے مرحلے میں تکینکی مذاکرات کرے گا۔
تفصیلات کے مطابق اسلام آباد میں پاکستان کی معاشی ٹیم اور آئی ایم ایف کے درمیان مذاکرات آج شروع ہوں گے۔
آئی ایم ایف کاوفد وزارت خزانہ پہنچ گیا ہے، وفد کی سربراہی آئی ایم ایف مشن چیف نیتھن پورٹر کر رہے ہیں۔
ذرائع نے بتایا ہے کہ وزارت خزانہ میں آئی ایم ایف مشن کو بریفنگ دی جائے گی، پہلے چار دن ٹیکنیکل مذاکرات ہوں گے، جس میں مختلف شعبہ جات کے ڈیٹا کا تبادلہ کیا جائےگا۔
ذرائع کا کہنا ہے کہ عوام کو مزید مشکلات برداشت کرناہوں گی ، غریب طبقے کو سبسڈی دے کر مشکلات سےبچانے کی کوشش کی جائے گی۔
ذرائع کے مطابق آئی ایم ایف مشن کو پٹرول مزید مہنگا کرنے، ایف بی آر، نیپرااوراوگرا ٹیرف میں اضافے اور گردشی قرضوں میں کمی کا پلان پیش کیا جائے گا۔
وزارت خزانہ اور نجکاری کمیشن اہداف پر عملدرآمد کی رپورٹ پیش کریں گے۔
