The news is by your side.

Advertisement

بجلی کی پیداواری لاگت میں کئی گنا اضافہ صارف ادا نہیں کرے گا تو کون کرے گا؟ نیپرا

اسلام آباد: نیشنل الیکٹرک پاور ریگولیٹری اتھارٹی (نیپرا) کا کہنا ہے کہ بجلی کی پیداواری لاگت میں 16 گنا اضافہ ہوا ہے، اگر یہ قیمت صارف ادا نہیں کرے گا تو کون کرے گا۔

تفصیلات کے مطابق نیشنل الیکٹرک پاور ریگولیٹری اتھارٹی (نیپرا) میں وفاقی حکومت کی جانب سے دائر کردہ ملک میں بجلی کے بنیادی یکساں ٹیرف کی درخواست پر سماعت ہوئی۔

چیئرمین نیپرا توصیف ایچ فاروقی نے سماعت کی صدارت کی۔

وفاقی حکومت نے نیپرا کو بجلی کی قیمت میں 7 روپے 91 پیسے اضافے کی درخواست دی ہے، سماعت کے بعد نیپرا اپنا فیصلہ وفاقی حکومت کو بھجوائے گی۔

سماعت کے دوران ایڈیشنل سیکریٹری پاور ڈویژن محفوظ بھٹی نے بریفنگ دیتے ہوئے بتایا کہ نیپرا 4 جون کو بجلی 7.91 روپے فی یونٹ اضافے کی منظوری دے چکی ہے، ہم چاہتے ہیں کہ صارفین پر ایک ساتھ بوجھ نہ ڈالا جائے۔

انہوں نے کہا کہ اضافے کے باوجود حکومت بجلی ٹیرف پر 220 ارب روپے کی سبسڈی دے گی، قیمت میں اضافے سے تقریباً 50 فیصد صارفین پر اضافی بوجھ نہیں پڑے گا، حکومت چاہتی ہے کہ تمام ملک میں یکساں بجلی ٹیرف لاگو کیا جائے۔

چیئرمین نیپرا توصیف ایچ فاروقی نے کہا کہ عالمی منڈی میں فیول پرائسز بڑھ رہی ہیں، 3 سال پہلے درآمدی کوئلہ 50 ڈالر فی ٹن تھا آج 400 ڈالر ہے، فیول لاگت میں 8 گنا اضافہ ہو چکا ہے، روپے کے مقابلے میں ڈالر بھی ڈبل ہو چکا ہے۔

انہوں نے کہا کہ بجلی کی پیداواری لاگت میں 16 گنا اضافہ ہوا ہے، اگر یہ قیمت صارف ادا نہیں کرے گا تو کون کرے گا۔ صورتحال ہمارے اندازے سے بہت آگے بڑھ چکی ہے۔

چیئرمین نیپرا کا کہنا تھا کہ نیپرا کا عالمی قیمتیں اور ڈالر کنٹرول کرنے میں کوئی اختیار نہیں، ہمارا اندازہ تھا کہ ڈالر 200 روپے سے اوپر نہیں جائے گا، اب ڈالر 222 روپے سے بھی اوپر جا چکا ہے۔

بجلی مہنگی کرنے کی درخواست پر سماعت مکمل ہوگئی، اتھارٹی ڈیٹا کی مزید جانچ پڑتال کے بعد اپنا تفصیلی فیصلہ جاری کرے گی۔

خیال رہے کہ وفاقی حکومت کی دائر کردہ درخواست میں کے الیکٹرک سمیت تمام ڈسکوز کے لیے بنیادی ٹیرف بڑھانے کی تجویز ہے، حکومت بجلی کا بنیادی ٹیرف مرحلہ وار بڑھائے گی۔

رواں ماہ جولائی سے بجلی 3 روپے 50 پیسے فی یونٹ مہنگی کرنے کی تجویز ہے، اگست میں بجلی کی قیمت میں مزید 3 روپے 50 پیسے فی یونٹ اضافہ کیا جائے گا جبکہ اکتوبر میں بجلی 91 پیسے فی یونٹ مزید بڑھائی جائے گی۔

Comments

یہ بھی پڑھیں