اسلام آباد: مہنگے بلوں کے ستائے صارفین کو ایک اور جھٹکا دیتے ہوئے نگراں حکومت نے بجلی کی فی یونٹ قیمت میں مزید اضافہ کر دیا۔
نیشنل الیکٹرک پاور ریگولیٹری اتھارٹی (نیپرا) کی جانب سے جاری کردہ نوٹیفکیشن کے مطابق بجلی ایک روپے 46 پیسے فی یونٹ مہنگی کر دی گئی، اضافہ جولائی کی ماہانہ فیول ایڈجسٹمنٹ کی مد میں کیا گیا۔
نوٹفیکیشن کے مطابق بجلی کی قیمت میں اضافے کا اطلاق ستمبر کے بلز میں ہوگا، لائف لائن اور کے-الیکٹرک صارفین پر اس کا اطلاق نہیں ہوگا۔
گزشتہ روز نیپرا نے واپڈا کی درخواست پر پن بجلی کے ٹیرف میں 29 فیصد اضافے کی منظوری دی تھی۔ پن بجلی کا اوسط ٹیرف 3 روپے 85 پیسے سے بڑھا کر 4 روپے 96 پیسے فی یونٹ مقرر کیا گیا تھا۔
نیپرا نے اضافے کی منظوری 2022-23 کیلیے دی۔ ٹیرف میں اضافے کا فیصلہ نگراں وفاقی حکومت کو بھی بھجوا دیا گیا۔
دوسری جانب نیپرا نے واپڈا کے پن بجلی اسٹیشنز کا کیپسٹی ٹیسٹس کروانے کا فیصلہ کیا۔ اس سلسلے میں سی پی پی اے کو ٹیسٹس کروانے کے احکامات جاری کر دیے گئے۔
نیپرا نے ہدایت کی کہ واپڈا کے تمام پن بجلی اسٹیشنز کا الگ الگ کیپسٹی ٹیسٹس کیا جائے، تمام اسٹیشنز کے کیپسٹی ٹیسٹس کی رپورٹ جمع کروائی جائے۔
پانی کے کم اخراج کے دوران پن بجلی پلانٹس کی دستیابی یقینی بنانے کے بھی احکامات جاری کیے گئے۔ واپڈا پانی کے اخراج کے بارے میں سی پی پی اے کو تفصیلات فراہم کرے گا جبکہ پیمائش کے حوالے سے واٹر فلو میٹر نصب کرے گا۔
نیپرا کی جانب سے سی پی پی اے اور واپڈا کو جاری پن بجلی پلانٹس کے معاہدے کرنے کی ہدایت کرتے ہوئے کہا گیا کہ جاری منصوبوں سے بجلی کی خرید و فروخت کے معاہدے کیے جائیں۔
