اسلام آباد : نیپرا نے کے الیکٹرک صارفین کیلئے بجلی 2.59روپےفی یونٹ فی یونٹ سستی کردی ، کمی کا اطلاق صرف مارچ کے مہینے کے بلوں پر ہوگا۔
تفصیلات کے مطابق نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے فیول چارجزایڈجسٹمنٹ کی مدمیں 2.59روپےفی یونٹ کمی کی منظوری دے دی ، منظوری دسمبر2021کےفیول چارجزایڈجسٹمنٹ کی مدمیں دی گئی۔
نیپرا کی جانب سے جاری نوٹیفیکیشن میں کہا گیا ہے کہ کے الیکٹرک نے1 روپے 80 پیسے فی یونٹ کمی کی درخواست کی تھی، اتھارٹی نے 2 فروری 2022 کو ایف سی اے پر عوامی سماعت کی تھی۔
نوٹیفیکیشن کے مطابق کمی کا اطلاق صرف مارچ کے مہینے کے بلوں پر ہوگا۔
نیپرا کا کہنا تھا کہ ٹیرف میں کمی کا اطلاق کے الیکٹرک کے تمام صارفین ماسوائے 300 تک یونٹ استعمال کرنے والے،لائف لائن اور زرعی صارفین پر ہو گا۔
یاد رہے گذشتہ ماہ نیپرا نے کےالیکٹرک صارفین کیلئے بجلی 76 پیسے فی یونٹ سستی کی تھی اور کہا تھا کہ بجلی کی قیمت میں کمی نومبر2021 کی فیول ایڈجسٹمنٹ کی مدمیں کی گئی، کےالیکٹرک صارفین کو کمی کا ریلیف فروری2022 کے بلوں میں ملے گا۔
