تازہ ترین

نیدر لینڈز: ترک شہری کی ٹرام میں فائرنگ سے 3 افراد ہلاک متعدد زخمی

ایمسٹرڈم: نیدر لینڈز کے شہر اُتریخت میں ایک ترک شہری کی ٹرام میں فائرنگ سے 3 افراد ہلاک جب کہ کئی زخمی ہو گئے۔

تفصیلات کے مطابق نیدر لینڈز کے شہر اتریخت میں ایک ٹرام میں مسلح شخص نے فائرنگ کر کے 3 افراد کو ہلاک کر دیا جب کہ متعدد زخمی ہوگئے، فائرنگ کے بعد حملہ آور فرار ہونے میں کام یاب ہو گیا۔

غیر ملکی میڈیا کے مطابق حملہ آور فائرنگ کے بعد کار میں بیٹھ کر فرار ہوا، عینی شاہد نے بتایا کہ حملہ آور اندھا دھند فائرنگ کر رہا تھا۔

پولیس نے فائرنگ میں ملوث مشتبہ شخص کی تصویر جاری کرتے ہوئے کہا ہے 37 سالہ حملہ آور ترکی کا شہری ہے۔ ڈچ پولیس کو اس سلسلے میں ایک ترک شہری گوکمن تانس کی تلاش ہے۔

نیدر لینڈز کے شہر اُتریخت میں فائرنگ کے واقعے کے بعد تمام ٹرام سروسز بند کر دی گئی ہیں، نیدر لینڈز کی انسداد دہشت گردی پولیس نے کہا ہے کہ بہ ظاہر یہ دہشت گردی کا واقعہ ہے۔

یہ بھی پڑھیں:  آسٹریلوی پولیس کا کرائسٹ چرچ واقعے میں ملوث‌ دہشت گرد کے گھر پر چھاپا

میئر اتریخت نے فائرنگ کے واقعے میں 3 افراد کی ہلاکت کی تصدیق کرتے ہوئے بتایا کہ حملے میں 9 افراد زخمی بھی ہوئے۔

خیال رہے کہ گزشتہ جمعے کو نیوزی لینڈ کے شہر کرائسٹ چرچ میں ایک آسٹریلوی شہری نے دو مساجد پر فائرنگ کر کے پچاس مسلمانوں کو شہید کر دیا تھا، اس واقعے کی دنیا بھر میں شدید مذمت کی گئی ہے۔

Comments

- Advertisement -