The news is by your side.

Advertisement

کراچی میں 552 برساتی نالوں کا جال، وزیر اعظم کی اہم ہدایت

کراچی: شہر قائد میں 552 برساتی نالوں کا جال پھیلا ہوا ہے، جن کی صفائی کا کام وزیر اعظم کی اہم ہدایت پر جاری ہے۔

اے آر وائی نیوز کے مطابق نیشنل ڈیزاسٹر منیجمنٹ اتھارٹی (این ڈی ایم اے) کی جانب سے کراچی میں برساتی نالوں کی صفائی مہم جاری ہے، یہ صفائی وزیر اعظم عمران خان کی ہدایت پر کی جا رہی ہے۔

رپورٹ کے مطابق شہر بھر میں 552 چھوٹے بڑے برساتی نالے ہیں،جن میں سے 38 بڑے نالوں میں سے 22 کی صفائی ہنگامی بنیادوں پر شروع کر دی گئی ہے، 19 نالوں کی صفائی کی ذمہ داری سندھ حکومت نے لی ہے۔

گجر نالہ، کورنگی نالہ، مواچھ گوٹھ نالے پر فرنٹیئر ورکس آرگنائزیشن (ایف ڈبلیو او) کام کر رہی ہے، 3 بڑے نالوں کے 21 مقامات پر چوک پوائنٹس کی صفائی جاری ہے، ان نالوں کی صفائی پر ایف ڈبلیو او کی 14 ٹیمیں کام کر رہی ہیں۔

صفائی ٹیموں نے 4 ہزار 364 ٹن کچرا نالوں سے نکالا ہے، ایف ڈبلیو او نالوں کی صفائی کا کام 24 گھنٹے کی بنیاد پر کر رہی ہے۔

یاد رہے کہ عید پر قربانی کے بعد آلائشوں کا بھی مسئلہ تھا، اس سلسلے میں عید الاضحیٰ آپریشن کے دوران مجموعی طور پر 3 روز میں 51 ہزار 312 ٹن آلائشیں محفوظ طریقے سے مدفون کی گئیں، وزیر بلدیات ناصر حسین شاہ کے مطابق تمام کلیکشن پوائنٹس صاف کر کے چونے کا چھڑکاؤ اور جراثیم کش ادویات کی اسپرے بھی کی گئی۔

قربانی کی آلائشوں کو محفوظ طریقے سے دفن کرنے کے لیے لینڈ فِل سائٹس جام چاکرو، گوند پاس شرافی گوٹھ اور کورنگی کراسنگ پر بنائی گئی تھیں، جب کہ آلائشوں کو ایک جگہ جمع کرنے کے لیے 85 کلیکشن پوائنٹس بنائے گئے تھے۔

دوسری طرف ایم کیو ایم نے تنقید کی ہے کہ کراچی کو پیپلز پارٹی کی سندھ حکومت نے کچرے کا ڈھیر اور عدم سہولتوں سے تباہ کر دیا ہے۔

Comments

یہ بھی پڑھیں