ابوظہبی: متحدہ عرب امارات کے شہریوں کو سال نو کا تحفہ مل گیا، ابوظہبی اور راس الخیمہ کے درمیان بس سروس کا آغاز ہونے جارہا ہے۔
اماراتی میڈیا کے مطابق ابوظہبی کے محکمہ ٹرانسپورٹ اور راس الخیمہ کی ٹرانسپورٹ اتھارٹی نے بس سروس کی مفاہمتی یاد داشت پر دستخط کیے ہیں، اس اقدام کا مقصد سرکاری اداروں کے مابین تعاون اور عوامی خدمات کی سہولیات میں مزید اضافہ کرنا ہے۔
بسیں جمعرات سے ہفتہ کو راس الخیمہ سے ابوظہبی روٹ پر چلیں گی اور اس کا پہلا بیچ صبح دس اور دوسرا سہ پہر تین بجے روانہ ہوگا، اس روٹ کا یکطرفہ کرایہ 45 درہم مقرر کیا گیا ہے۔
ابوظہبی سے راس الخیمہ کے روٹ پر ان ہی دنوں میں پہلا قافلہ دوپہر ڈھائی اور دوسرا شام ساڑھے سات بجے روانہ ہوگا تاہم اس کا کرایہ 35 درہم طے پایا ہے۔
اس معاہدے سے دو اماراتوں کے درمیان رہنے والے شہریوں کو بہترین سفری سہولت میسر آئے گی جب کہ مناسب کرایوں کی بدولت دونوں جانب کے مکین بخوشی اس سروس سے فائدے اٹھائیں گے۔
