اسلام آباد: نئے چیف جسٹس میاں ثاقب نثار نے پاناما کیس کی سماعت سے معذرت کرتے ہوئے مقدمے کی سماعت کے لیے نیا 5 رکنی بینچ تشکیل دے دیا، بینچ کی سربراہی جسٹس آصف سعید کھوسہ کریں گے۔
تفصیلات کے مطابق چیف جسٹس میاں ثاقب نثار نے مقدمات سے متعلق پہلی فہرست جاری کردی، عہدے کا حلف اٹھاتے ہی انہوں نے خود کو پاناما کیس کی سماعت سے علیحدہ کرلیا اور کیس کی سماعت کے لیے 5 رکنی نیا بینچ تشکیل دے دیا۔
پاناما کیس کی 4 جنوری سے ہونے والی از سر نو سماعت جسٹس آصف سعید کھوسہ کی سربراہی میں بینچ کرے گا۔
بینچ میں جسٹس عظمت سعید، جسٹس اعجاز افضل جسٹس گلزار احمد اور جسٹس اعجاز الحسن شامل ہیں۔ ذرائع کے مطابق جسٹس امیر ہانی مسلم کو نئے بینچ کا حصہ نہیں بنایا گیا۔
سابق چیف جسٹس نے 9 دسمبر کو پاناما کیس کی نویں سماعت کے موقع پر مختصر فیصلہ سناتے ہوئے ریمارکس دیے تھے کہ نیا بینچ اب تک کے مقدمے کو سنا ہوا نہ سمجھے۔ جسٹس انور ظہیر جمالی نے ریٹائرمنٹ کے سبب مقدمے کی مزید سماعت سے معذوری ظاہر کی تھی۔