The news is by your side.

Advertisement

نئے برطانوی پاؤنڈ پر جنگ عظیم دوئم کے زمانے کے ریاضی دان کی تصویر

لندن: برطانیہ میں 50 پاؤنڈ کا نیا نوٹ جاری کردیا گیا جس پر جنگ عظیم دوئم کے زمانے کے ریاضی دان ایلن ٹیورنگ کی تصویر ہے، ایلن نے جرمنوں کا وہ خفیہ کوڈ توڑا تھا جس کے تحت جرمن فوجی پیغامات کی ترسیل کرتے تھے۔

بین الاقوامی میڈیا کے مطابق برطانیہ میں 50 پاؤنڈ کا نیا نوٹ مارکیٹ میں آگیا، نئے پلاسٹک نوٹ پر جنگ عظیم دوئم کے زمانے کے ریاضی دان اور کمپیوٹر سائنٹسٹ ایلن ٹیورنگ کی تصویر ہے۔

حکام کے مطابق دکاندار پرانا پیپر نوٹ 30 ستمبر 2022 کے بعد قبول نہیں کریں گے، 50 پاؤنڈ کا نوٹ برطانیہ کا سب سے بڑا کرنسی نوٹ ہے۔

ایلن ٹیورنگ کون ہے؟

23 جون 1912 کو لندن میں پیدا ہونے والے ایلن ٹیورنگ سنہ 1938 میں اس ٹیم کا حصہ بنے جسے جنگ کے دوران جرمنوں کے کوڈنگ پیغامات سمجھنے کے لیے رکھا گیا۔

اینگما کوڈ کے ذریعے جرمن فوجیوں کے درمیان پیغامات کی ترسیل ہوتی تھی اور اسے سمجھنے کا سہرا ایلن ٹیورنگ کے سر جاتا ہے جو لگاتار 3 سال اس پر محنت کرتے رہے۔

برطانوی حکام کے مطابق اس کوڈ کو توڑنے کے لیے ایک غیر معمولی طور پر ذہین شخص کی ضرورت تھی اور ایلن ٹیورنگ وہی شخص تھے۔

اس وقت لگائے گئے اندازوں کے مطابق اس ریاضی دان کی کوشش کے باعث جنگ عظیم دوئم کا دورانیہ 2 سال گھٹ گیا اور اس کی وجہ سے 1 کروڑ سے زائد افراد کی جانیں بچائی گئیں۔

جس وقت ایلن نے اس کوڈ کو توڑا اس وقت انہیں پتہ چلا کہ جرمن ایک مسافر بحری جہاز پر حملے کا ارادہ رکھتے ہیں جس پر کئی سو افراد سوار تھے۔ اگر اس حملے کی بروقت اطلاع دی جاتی تو جرمنوں کا وار خالی جاتا اور وہ جان جاتے کہ ان کے کوڈ کو توڑ لیا گیا ہے۔

بدقسمی سے ایلن کی ٹیم کے ایک رکن کا بھائی اس جہاز میں موجود تھا، ایلن اور ان کے ساتھیوں نے وسیع تر مفاد کی خاطر دل پر پتھر رکھ کر اس حملے کو ہونے دیا تاکہ جرمن ہوشیار نہ ہوسکیں۔

ایلن ٹیورنگ ہم جنس پرست تھے جو اس وقت برطانیہ میں ایک جرم تھا، چنانچہ ایلن نے اپنا آخری وقت عدالتوں کے چکر کاٹتے اور بعد ازاں حکومتی نظر بندی میں گزارا۔ سنہ 1954 میں ایلن اپنے گھر میں مردہ پائے گئے، کہا جاتا ہے کہ انہوں نے خودکشی کی تھی۔

سنہ 2013 میں ملکہ الزبتھ دوم نے ایلن ٹیورنگ کے لیے بعد از مرگ معافی کا اعلان کیا۔

ایلن ٹیورنگ پر ہالی ووڈ فلم دی ایمی ٹیشن گیم بھی بنائی جاچکی ہے جس میں ریاضی دان کا مرکزی کردار بینڈکٹ کمبربیچ نے ادا کیا جبکہ کیرا نائٹلی نے ان کی ٹیم ممبر اور منگیتر کا کردار ادا کیا۔

Comments

یہ بھی پڑھیں