لاہور : پیپلزپارٹی نے نئی مردم شماری پر وزیراعظم شہباز شریف کا بیان مسترد کردیا، پی پی رہنما حسن مرتضیٰ کا کہنا ہے کہ ان کا بیان ناقص سیاسی سوجھ بوجھ کی عکاسی ہے۔
اس حوالے سے جنرل سیکریٹری پی پی پنجاب حسن مرتضیٰ نے میڈیا سے گفتگو کرتے ہوئے کہا ہے کہ وزیراعظم کا نئی مردم شماری سے متعلق عام انتخابات کا بیان ان کی ذہنی اختراع اور ناقص سیاسی سوجھ بوجھ کی عکاسی کرتا ہے۔
انہوں نے کہا کہ نئی مردم شماری کے مطابق انتخابات کا بیان افسوسناک ہے، لگتاہے وزیراعظم عام انتخابات کے انعقاد میں مزید تاخیر چاہتے ہیں۔
پی پی پنجاب کے مرکزی عہدیدار کا کہنا تھا کہ انتخابات میں تاخیری حربے استعمال کرنا مسلم لیگ ن کی سیاسی سوچ کا مظہر ہے۔
حسن مرتضیٰ نے کہا کہ ہمارامطالبہ ہے کہ فی الفور شفاف انتخابات کی راہ ہموار کی جائے، پیپلزپارٹی ماورائے آئین فیصلوں کا کسی صورت حصہ نہیں بنے گی۔
حسن مرتضیٰ نے کہا کہ پٹرولیم مصنوعات اور بجلی کی قیمتوں میں حالیہ اضافہ افسوسناک ہے
یاد رہے کہ گزشتہ روز نجی ٹی وی چینل سے گفتگو کرتے ہوئے پیپلز پارٹی کے مرکزی رہنما فیصل کریم کنڈی نے اس حوالے سے کہا تھا کہ حکومت کو آرٹیکل 51 تھری میں ترمیم کرنا پڑے گی، کیا آئین میں تبدیلی کے لیے ان کے پاس دو تہائی اکثریت ہے؟
انہوں نے کہا کہ پیپلزپارٹی کا مؤقف ہے کہ الیکشن وقت پر ہونے چاہئیں، سمجھ نہیں آرہا کہ سیاسی جماعتیں کیوں الیکشن سے بھاگ رہی ہیں، 6 یا 9 ماہ بھاگنے کے بعد آپ کے پاس کیا کوئی نئی چیز آجائے گی، حکومت کو چاہئے کہ الیکشن میں جائے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں