دبئی: یو اے ای حکومت نے کرونا کا پھیلاؤ روکنے کے لئے بڑا فیصلہ کیا ہے۔
میڈیا رپورٹ کے مطابق امارات حکومت کی وفاقی اتھارٹی برائے انسانی وسائل(ایف ایچ آر) نے وزارت صحت کے اشتراک سے ایک سرکلر جاری کیا ہے، جو کہ عالمی وبا سے نمٹنے کے لئے بعض طریقہ وضوابط کار میں ترامیم سے متعلق ہے۔
میڈیا رپورٹ کے مطابق اتھارٹی نے واضح کیا کہ اب وفاقی ملازمین کو ہر دو دن بعد ‘نیزل سواب ٹیسٹ’، ‘پی سی آر’ ٹیسٹ کرانا ہوگا، تاہم ان ملازمین کو استثنیٰ حاصل ہوگا جوکہ کرونا سے بچاؤ کے دونوں خوراکیں لگواچکے ہیں، تبدیل شدہ طریقہ کار پرعملدرآمد کا آغاز انتیس اگست دو ہزار اکیس سے ہوگا۔
وزارت صحت کی جانب سے کہا گیا ہے کہ ایسے افراد جو اپنی صحت کے پیش نظر ویکسین لگوانے سے قاصر ہیں، انہیں بھی نئے طریقہ کار میں شامل نہیں کیا گیا ہے۔
یہ بھی پڑھیں: منی لانڈرنگ مقدمات نمٹانے کے لئے یو اے ای کا تاریخی اقدام
سرکلر میں کہا گیا ہے کہ وفاقی حکومت کے اداروں کی جانب سے کنٹریکٹ پر رکھی جانے والے آؤٹ سورس کمپنیاں یا پبلک سروس کمپنیاں ، اپنے ایسے ملازمین کا ہر اڑتالیس گھنٹے بعد لازمی پی سی آر ٹیسٹ کرائیں گی جو کہ حکومتی دفاتر میں فل ٹائم بنیاد پر کام کررہے ہیں جبکہ اس ٹیسٹ کی قیمت بھی متعلقہ کمپنی کو ادا کرنا ہوگی۔
اس کے علاوہ ایسے کنسلٹنٹ یا ماہرین جنہیں میٹنگز میں شامل ہونا ہوتا ہے یا انہیں حکومتی دفاتر کی حدود میں موجود رہنا ہوتا ہے، انہیں بھی اس مرحلے سے گزرنا ہوگا،ماسوائے ان کےجنہوں نے ویکسین کی دو خوراکیں لے لی ہیں۔
