نئی دہلی: بھارتی دارالحکومت نئی دہلی میں پلاسٹک کی اشیا کے استعمال پر مکمل طور پر پابندی عائد کردی گئی ہے۔
بھارت کے نیشنل گرین ٹربیونل کی جانب سے عائد کی جانے والی اس پابندی کے تحت پلاسٹک کے برتن بشمول پلیٹ اور کپ، تھیلے، اور چیزوں کو لپیٹنے کے لیے بھی پلاسٹک کے استعمال کو قطعی ممنوع قرار دے دیا گیا ہے۔
مزید پڑھیں: ماحول دوست پلاسٹک بیگ تیار
بھارتی اخبار ٹائمز آف انڈیا کی ایک رپورٹ کے مطابق بھارت میں استعمال کیے جانے والے پلاسٹک کو جب پھینکا جاتا ہے تو یہ سمندروں میں پلاسٹک کی عالمی آلودگی کا 60 فیصد حصہ بنتا ہے۔
بھارتی حکام کے مطابق یہ پابندی ان شکایات کے بعد عائد کی گئی ہے جو شہریوں کی جانب سے کی گئیں جس میں کہا گیا کہ شہر میں قائم کچرا جمع کرنے کے مقامات پر بڑی مقدار میں کچرا جلایا گیا جو شہر کی فضا کو بے تحاشہ آلودہ کرنے کا سبب بنا۔
مزید پڑھیں: فرانس کا پلاسٹک سے بنے برتنوں پر پابندی کا فیصلہ
واضح رہے کہ پلاسٹک ایک ایسا مادہ ہے جسے ختم ہونے یا زمین کا حصہ بننے کے لیے ہزاروں سال درکار ہوتے ہیں۔ یہی وجہ ہے کہ یہ ماحول، صفائی اور جنگلی حیات کے لیے ایک بڑا خطرہ تصور کیا جاتا ہے۔
پلاسٹک شہروں کی آلودگی میں بھی بے تحاشہ اضافہ کرتا ہے۔ یہی وجہ ہے کہ دنیا کے کئی شہروں میں پلاسٹک پر پابندی عائد ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں