آکسفورڈ: برطانیہ میں کرونا وائرس سے بچاؤ کے لیے عوام کو نئی ہدایات جاری کر دی گئیں۔
تفصیلات کے مطابق مہلک کرونا وائرس سے بچاؤ کے لیے برطانوی عوام کے لیے نئی ہدایات جاری کی گئی ہیں، ترجمان محکمہ صحت نے کہا ہے کہ وائرس کی علامات کی صورت میں گھروں میں ہی رہا جائے۔
عوام کو ہدایت کی گئی ہے کہ اگر کسی شہری کو کرونا وائرس کی علامات کا شبہ ہے تو اسپتال جانے کی بہ جا ئے ٹریپل ون پر کال کی جائے۔ محکمہ صحت برطانیہ کا کہنا ہے کہ وائرس کے شبہے میں اب تک 2521 افراد کے ٹیسٹ کیے جا چکے ہیں، جن میں سے 9 افراد کے ٹیسٹ کے نتائج مثبت آئے۔
کروناوائرس کا پارلیمنٹ تک پہنچنے کا خطرہ
کرونا وائرس برطانوی پارلیمنٹ تک پہنچنے کا خطرہ بھی بڑھ گیا ہے، لیبر پارٹی کے 2 ممبران پارلیمنٹ کے کرونا وائرس ٹیسٹ مکمل کر لیے گئے ہیں تاہم ابھی رپورٹ سامنے نہیں آئی، مہلک وائرس کے خطرے کے پیش نظر دونوں ممبران پارلیمنٹ کو علیحدہ مقام پر منتقل کیا گیا۔
دوسری جانب لیڈز نارتھ ویسٹ اسمبلی رکن الیکس سوبل نے انکشاف کیا ہے کہ انھوں نے کرونا وائرس کا ٹیسٹ کروایا جس کا رزلٹ مثبت آ گیا ہے، الیکس سوبل نے تصدیق کی کہ انھیں اپنی طبیعت اچھی محسوس نہیں ہو رہی تھی جس کے بعد انھوں نے ٹیسٹ کروانے کا فیصلہ کیا تھا۔ ایک کانفرنس میں جانے سے قبل کرونا وائرس کا ٹیسٹ کروایا جس میں مرض کی تشخیص ہو گئی۔ بعد ازاں برطانوی محکمہ صحت نے لندن میں منعقدہ کانفرنس میں شریک ہونے والے سیکڑوں لوگوں سے رابطے شروع کیے۔
